Anino sa Kulto

“Okey,” sa hepe nga miuyon sa panahom ni Carlo. “Areglado.”

Nahipno ang ilang kasabotan. Nahimuot si Carlo nga miuyon ang hepe sa iyang sugyot. Alang kaniya, kadto usa na ka timailhan sa umaabot nga kapukanan sa supremo sa kulto.

“Unya, Dick,” ni Carlo pagkilab sa pipila ka daklit. “Dili na ko magdugay.”

“Ikaw ang mag-igo, Carlo,” matud ni Maj. Campo. “Magtawganay lang unya kita kun may development na bahin sa supremo sa Tambayawan.”

Mibarog si Carlo. Misunod usab pagbarog si Maj. Campo ug gipig-it niini’g hugot ang iyang tuong kamot.

“Good luck, Carlo,” matud sa hepe. “Apan pag-amping. Tuso ang tawo nga gusto natong lukongon.”

“Kamo usab, Dick,” ni Carlo pa. “I wish you good luck. Pag-amping sab mo. Di ko buot nga may usa kanato nga mahulog sa alaot sa iyang mga kamot. Kinahanglan nga siya ang atong masikop.”

Gikuyogan siya sa hepe hangtod sa may pultahan sa lawak-buhatan niini. Nakalakaw na siya’g layolayo dihang iyang nabati nga milagubo ang palid sa pagkasera sa pultahan sa lawak buhatan sa hepe.

Pag-abot ni Carlo sa nahimutangan sa iyang awto, miluwan gilayon siya ug milingkod sa lingkoranan atubangan sa manibela. Apan wala una niya paandara ang makina sa sakyanan. Mao hinuo’y iyang gikuha ang cellphone gikan sa bolsa sa iyang diyaket. Iyang gipislit ang OK button niini. Unya iyang gipangita sa phonebook niini ang numero sa cellphone ni Z. Dihang iya kining nakaplagan, iyang gisulayan pagkontak.

Gitubag dayon ni Z ang iyang tawag. Ug nagkasulti sila. Iyang gitaho sa iyang labaw sa VIDA ang tanang mga panghitabo. Gisuginlan niya kini bahin sa kaso nga buot pakuptan ni Dr. Castro kaniya. Miuyon si Z dihang gipasabot niya kini’g maayo sa merito sa maong kaso, nga may kalambigitan usab kini sa kamatayon sa iyang mga ginikanan ug ingon man ni Agent W-12 nga gituohan nilang maoy unang gipatay sa misteryoso niyang kaaway. -- Sumpayan pa