Magkakontra partido

Layo pa gani ang adlaw sa eleksyon, lanog na kaayo ang pangalan ni Mr. Onedo alang sa pagka kapitan sa ilang barangay. Kanunay man god kining gipasapasa sa mga baba sa mga pumipili. Ilabi na niadtong mga mahiligon kaayo sa pulitika.

Sa iyang bahin hinuon, morag wala pa gayud makadesider si Mr. Onedo. Gani, igo man lang siyang mokatawa, kun duna nay mosangpit kaniyag kapitan. Duna may guy mga siaw kaayo nga magpauna-una’g sangpit kaniya sa maong titulo. Labi na gyud kadtong mga tawo nga dako kaayo’g tinguha nga siya gayud si Mr. Onedo, maoy mahimong kapitan sa ilang barangay.

Ubay-ubay man god kaayo ang nakauyon, nga siya si Mr. Onedo, maoy mahimong kapitan sa ilang barangay. Nga maoy ipuli nila sa ilang kasamtangang kapitan nga si kapitan Josh. Kay si Kapitan Josh, anaa naman sa iyang kataposang termino. Isip barangay kapitan. Ug dili naman siya makahimo sa paglansar.

Kadaghanan god sa mga tawo diha sa ilang dapit, dako man kaayo og pagsalig kang Mr. Onedo. Nga maoy mohupot sa katungdanan pagka kapitan. Kay gawas nga si Mr. Onedo, edukado, kay usa man gani siya ka retiradong magtutudlo, maligdong ug tarong pa gyud siyang pagkatawo. Dili pa sipukado og ulo. Ug maayong makigdait sa iyang isigkaingon.

Ug tungod lagi sa iyang gihuptan nga mga hiyas, daghan kaayo ang nag-awhag kaniya kang Mr. Onedo, nga palansaron gayud sa umaabot nga eleksyon, pagka kapitan. Gani nagkalainlain lang mga sektor sa tawo ang motuyo lang gyud og anha sa ilang balay ni Mr. Onedo, aron sa pag-awhag ug pagkumbinser kaniya sa paglansar gayud. Pagka barangay kapitan.

Kun unsa man kakusog ang pag-awhag sa mga katawhan ngadto kang Mr. Onedo, mao usab kakusganon ang pagpugong sa usa ka anak nga dalaga ni Mr. Onedo, nga si Aira, nga dili lang gayud siya paapil-apilon sa politika. Labi na sa paglansar pagka kapitan sa ilang barangay.

Gibugnaw pa gani siya sa iyang anak, nga dili kuno maayong intrahan ang politika, kay hugaw kuno kaayo kini. Ug makabungkag lang sa maayong relasyon nato sa atong isigkaingon. Bisan pa gani ngadto sa atong labing suod nga mga kadugo.

Apan naapsan kaayo ni Mr. Onedo, ang tinuoray'ng tuyo sa iyang anak, nga si Aira. Nahibawo kaayo siya, kun nganong dili gyud kini mouyon, nga molansar siya si Mr. Onedo pagka kapitan, diha sa ilang dapit.

Kay kun mopadayon gyud si Mr. Onedo sa paglansar sa pagka kapitan, sigurado man gyud nga ang mahimo niyang kaatbang sa maong puwesto, mao man si Jun Riel, ang hinigugma ni Aira. Nga maoy kandidato sa taga administrasyon. Ug gipaluyohan gani sa mayor sa lungsod.

Samtang nagkaduol na ang adlaw sa piniliay, misamot usab og kalibog ang ulo ni Mr. Onedo. Naglibog man god siya kun hain ang iyang palabihon. Ang awhag ba sa mga katawhan ug ang tambag ba sa iyang anak si Aira? (Kataposan)