Little black book

Gula 101

Sukad niadto, wala nay bugto ang komunikasyon namo ni Cassey pinaagi sa cellphone. Kanunay kaming magpadad-anay og text messages.

Gisulat sab nako ang iyang ngalan sa akong little black book, ang listahan sa mga ngalan sa mga babaye nga akong naibgan.

Nagplano kong panguyaban si Cassey kun makakita ko’g tukmang panahon. Ngano man diay kun usa lang ko ka taxi driver ug siya usa ka propesyonal? May katungod man ming magkahigugmaay sa usa’g-usa.

Aron matawag og pormal, gibisitahan ko siya sa balay sa iyang igsuon sa Alabang nga mao say iyang gipuy-an. Didto gipadayag ko kaniya ang akong gibati. Apan gibalibaran niya ang akong gugma.

May boyfriend na kuno siya, maoy iyang balibad.

Pagkasunod semana, gibisitahan ko siya pag-usab. Misamot ang kahugot sa iyang pagbalibad ug pagdumili sa gugmang akong gihalad niya.

Ug sa misunod pa gyud nakong pagpamisita, wala na ko niya atubanga. Wala na sab niya tubaga ang akong text messages. Nagtuo kong nag-ilis siya’g SIM kay dili na man makontak ang iyang numero sa akong phonebook.

Gisakitan ko’s gihimo ni Cassey. Nasuta man gud nako nga gusto na siyang molikay nako sa hingpit.Wala gyud tingali siya makagusto nako!

Mora’g dili ko makadawat sa kapakyasan sa akong gugma kang Cassey. Ako man gong nasuta sa akong kaugalingon nga in love kaayo ko niya. Lahi siya sa ubang mga babaye nga akong nailhan. Talagsaon si Cassey. Ug kun iya kong sugton, siya nay akong dad-on sa altar sa kaminyoon.

Tungod sa kapakyasan sa akong gugma kang Cassey, mora’g dili na ako gustong makakita sa dapit diin ko siya nakita--ang Manila. Maong mipauli ko sa Sugbo sa tuyo nga mahikalimtan ko siya sa hingpit. Ug nanumpa ko sa akong kaugalingon nga bisan magkinaunsa ang panahon, dili na gyud ako magminyo! -- Taposon sunod gula