Duha ka anghel

Sa sinugdanan, gihimo sa Diyos ang mga anghel ug gibutang si Miguel Archangel nga pangulo sa mga anghel. Gihimo usab sa Dios si Kabugason, ang anak sa kabuntagon.

Si Kabugason nagmapahitas-on ug gustong molabaw pa sa nagbuhat kaniya.

"Ilabay ko ikaw sa kalibotan ug dili na ikaw makabalik dinhi tungod kay ikaw nagmapahitas-on," matud sa Magbubuhat.

Milabay ang mga libo ka tuig, "Miguel, adtoa sa kalibutan ug susiha kun unsay ilang kahimtang didto," matud sa Ginoo. "Susiha usab kun unsa nay gidangatan nila ni Kabugason."

Wala pa gani katugpa sa kalibutan si Miguel, gisugat na siya ni Kabugason nga karon nahimo nang si Lucifer.

"Unsa may imong himoon dinhi nga ako may hari dinhi sa kalibutan?" matud ni Lucifer.

"Gipasusi sa Magbubuhat kun unsay kahimtang sa mga tawo karon dinhi."

"Maayo aron sab akong imatuod nga ako na ang gi-ilang hari dinhi sa kalibutan."

Busa gisuroy ni Lucifer si Miguel sa tibook kalibutan. Wa madugay mitugpa sila sa namaligya og diyaryo ug gipangbasa ang mga balita.

"Patay ... lugos ... tulis ... drugas ... tikas..." ni Miguel nga nagbasa sa mga headline.

"Unsa na! Ako na silang mga tawo, loyal kaayo na nako."

Nangadto sila sa motel. Nakurat si Miguel sa iyang nakita. Abi niya'g si Adan ug Eba, ang duha nga naghubo.

"Bilib ka na nako? Ako gihapon nang mga tawo."

Nagpanlingo si Miguel, mobalik na unta siya sa langit apan naisip niya nga mohapit sa simbahan ug nakita niya ang naghuot nga mga manimbahay.

"Unya, unsay imong ikasulti nga daghan mang mga tawo dinhi?"

"Aw, ako gihapon nang mga tawo. Tan-awa ra nang naglinya, nagbalikbalik lang og pangumpisal sa ilang mga raket." Huyhoy ang abaga ni Miguel nga mibalik sa langit, apan may lain nga gisugo ang Magbubuhat, aron luwason ang katawhan sa gitagana nga silot. Iya pang gihatagan og higayon nga magbag-o ug makahinumdom ang mga tawo ngadto sa Kahitas-an. (Katapusan)