Anino sa kulto

Gula 77

Nakahinuktok si Carlo sa gipamulong ni Dr. Castro.

“Mao kini hinungdan nga midangop ako kanimo,” sa doktor pa. “May abilidad ka sa paniktik busa nagtuo ko nga imo akong katabangan.”

“Dili kaha masilo si Maj. Campo kun masayod siya nga nagpatabang ka kanako?” Sukit ni Carlo. “Gisang-at na raba nimo sa iyang lamesa kining kasoha. Tingalig lainon niya pagsabot ang pagkuha mo sa akong serbisyo.”

“Wala siya’y angay ikasilo,” matud sa doktor. “Apohan ko sa bata nga gipatay ug nangita’g daling kasulbaran. Katungod ko ang pagkuha sa serbisyo ni bisan kinsa nga gituohan kong makatabang nga dili na kinahanglang magpahibalo pa sa kapolisan. Angay gani hinuon nga malipay ang hepe kay may makatabang na kanila nga usa ka private eye sa pagsulbad sa mga krimen nga mahitabo karon dinhi sa Mabini.”

Nahilom si Carlo. Gipalugdang niya sa iyang kaisipan ang tanang gipamulong sa doktor. Nakaingon siya sa hilom nga husto si Dr. Castro sa pagdangop niini sa usa ka detektib. Lainlain ang mga paagi sa polis ug ang tiktik sa pag-imbestigar og kaso. Gani daghan nang unsolved crimes nga gikuptan sa kapolisan nga nasulbad sa mga detektib. Basin diay kun siya’y suwertehon nga makasulbad niining kaso karon sa pagpamatay sa mga batang babaye sa Mabini diin gilambigit ni Dr. Castro ang mga sakop sa Tambayawan Black Brotherhood.

Nakahatag og interes ni Carlo ang kulto. Nalambigit kini sa kaso sa pagpatay sa iyang mga ginikanan. Sakop sa maong kulto ang suspetsado sa pagpatay kanila. Misantop sa hunahuna ni Carlo nga posibleng usa sa mga disipulo sa Tambayawan nga naglihok karon sa Mabini mao ang misteryosong kaaway niya nga maoy nagpatay sa iyang mga ginikanan. Nahanduraw sa sekreta nga kun buligan siya sa kahigayonan, masulbad niya ang kaso sa pagpatay sa iyang mga ginikanan dungan sa pagkabungkag unya sa Tambayawan Black Brotherhood. -- Sumpayan pa