Bunga sa kamapatuyangon

Bugti sa kagangggg!!! Nganong imo man kanang gipanaoban, Luz?" singaak ni Fredmon ngadto sa iyang asawa nga naabtan niyang nanaob sa ginubang mga kahoy sa iyang paghiuli gikan sa trabaho. Gitan-aw niya ang dapit nga gitapokan niini. Nahurot nag pangitsa ni Luz ngadto sa nag-ulbong kalayo.

"Unsaon man 'ni nimo?' inggit nga tubag-sukna ni Luz.

"Gamiton! Pamilian ko unta sa mga maayo ug ang mga daotan akong pamughaon aron atong isugnod!" ni Fredmon pang nagpanakla.

"Isugnod? Nganong mag-antos man tag sugnod og kahoy nga naa may gas stove nga sayon kaayong pasigaon ug dili pa mangitom sa anuos ang atong mga kaldero? Mahitungod sa mga maayo, ato man ganing gipasemento ang atong kusina aron wa nay mga agay-ay ug mga anay nga molaglag, apan karon nasuko ka nga akong panaoban kay imo pang gamiton?" ni Luz pang nanuso sa mga kahoy ngadto sa daob kansang siga hangol kaayong mikaon niini.

"Uy, Luz, hinugay na sa imong kamapatuyangon," ni Fredmon pang mibatig kaitok. "Hunahunaa ang atong ugma. Kinahanglan nga magdaginot ta. Ang panahon dili baya managsama. Kinsay makaseguro nga moabot ang panahon nga nawad-an ako’g trabaho?"

"Aw, klaro! Apan unya na sa imong pagretiro. Batan-on ka pa, Fredmon. Bayente anyos pa ang imong hangaton una ikaw moretiro. Busa, pahimuslan tang panahon. Unya ra ta magtinihik kun hapit ka na magpensiyonado."

Aron dili mataas ang ilang panaglalis milakaw na si Fredmon. Misaka siya sa balay aron mag-ilis.

Si Luz labihan kamasinahon. Dili siya magpalupig sa iyang mga silingan.

Kun unsay ilang buhaton iya usab kining himoon. Nakapalit siyag awto, refrigerator, telebisyon, gas stove ug uban pang mahalong mga butang kay namalit man niini ang ilang mga silingan. Nagpataod usab silag aircon sa dihang nagpataod ang ilang silingan. Karong bag-o nagpaguba ang ilang silingan sa kahoy nilang kusina ug gipailisag semento, iya usab nga gipaguba ang kahoy nilang kusina ug iya usab kining gipasemento. Miuyon si Fredmon kay iya mang nakita nga gabok na kaayo kay gikuninitan sa mga anay ug agay-ay. Usa ka Division Manager ang iyang bana sa Marpuen Consolidated Mining & Development Corporation, ang ikaduhang matang sa minahan sa tumbaga sa tibuok kalibotan.

Nanglabay ang mga adlaw. Mihugpa ang krisis sa mga mina. Nanaktak og mga trabahador ang Marpuen. Apan nagpadayon ang krisis pagkitkit sa maong negosyo. Lain na usab nga panaktak ang gihimo sa Marpuen. Apan,kay dili na man gayod mabangbang ang kaalkanse napugos ang kompaniya pagtak-op sa negosyo.

Tungod kay wa nay trabaho naaghat pagbaligya ang magtiayong Fredmon ug Luz sa ilang awto. Gisunod nila pagbaligya ang aircon, ref. ug tv. Tungod sa kalisod nga nagpadayon pagpigis sa ilang kinabuhi naaghat sila pagbaligya sa nahabilin nilang kahimanan lakip na ang gas stove nga gikawid-an ni Luz.

"Tan-awa, Luz," panudya ni Fredmon kang Luz nga naluyag huyop sa nag-unawop nga kayo sa basa-basa nga kahoy nga ilang napalit. "Tungod sa imong kamapatuyangon naingon ka niana. Kun wa mo panaobi ang mga kahoy hangtud unta karon ang imong pagsugnod!"

Wala motingog si Luz nga nagpadayon pagmaneho sa nag-unawop nga mga sugnod. (Kataposan)