Tentasyon

Gihatud ni Ritchie pauli sa iyang gipuy-an si Camel nga sa gihapon pakyas siya pag-angkon sa kaputli sa dalaga.

Nahibulong si Ritchie kay sa tanan niyang mahimong hinigugma kang Camel ra nga dili siya makahimo pakigbuwag. Ang uban niyang hinigugma nga magpadili-dili pagtugyan sa ilang pagkababaye, iya dayong biyaan.

Kini maoy nakapasamot sa presyo ni Camel. Nahimong mahal kaayo si Camel kaniya. Nahuna-huna niya nga si Camel gayud ang angay’ng dad-on niya sa altar sa kaminyoon.

Nanglabay pa ang mga adlaw, kay layo na man kaniya og gitrabahoan si Camel, dili na sila magkauban matag hapon inighuman sa ilang trabaho.

Si Christy maoy nahimo niyang suod. Ingon sa duol usab kaayo ang pagtagad ni Christy kang Ritchie. Wala makapugong si Ritchie, iyang gipangulitawhan ang bag-ong secretary sa general manager.

Tuod, wala gayud siya mapakyas. Atol sa ilang pagpanuroy human sa trabaho, gisugot siya ni Christy samtang diha sila sulod sa kotse.

Sa unang higayon, gihagkan ni Ritchie si Christy. Pinaukob nga hawok sa ngabil sa dalaga. Lalim kaayo ang gibati ni Ritchie nga ang gwapa nga secretary ni GM Lea nahimo niyang hinigugma.

Nakabantay man gud si Ritchie nga sa iyang mga kauban daghan ang nakagusto kaniya ug nangita lang og higayon nga makadiga.

Hilom ang relasyon nila ni Ritchie ug Christy. Wala kaayo sila magpasabot sa ilang kaubanan nga duna sila’y relasyon. Hangtud nga usa ka gabii, nag-disco sila.

Miinom si Christy og red wine. Nagkainit ang kalawasan ni Christy sa iyang nainom ug sa kanunay’ng pagpares nila’g sayaw ni Ritchie. Nagkakusog usab siya nga miinom.

Gikalipay kini sa hilom ni Ritchie. Miabut g’yud ang panahon nga daw mikuyamang na sa kalawasan ni Christy ang makamandag nga espiritu sa iyang giinom.

“Tana Christy, manggawas na ta kay nakainom ka na,” giingnan ni Ritchie ang dalaga.

Tabian na kaayo ang dalaga, sa laktud hubog na g’yud. Giromansa ni Ritchie si Christy sulod sa sakyanan. Dugay ang pag-ukobay sa ilang mga ngabil, samtang nagpanghiram ang mga kamot sa kalawasan sa dalaga.

Lahi kang Camel, si Christy wala gayud mosanta ni Ritchie nga nagtagbaw sa paghikap sa mga pribadong parte sa iyang lawas.

Nasabtan ni Ritchie nga init na kaayo ang kalawasan ni Christy. “Tana, mamalhin kita sa bugnaw nga dapit Christy,” iyang giingnan ang hinigugma.

Mipadagan dayon si Ritchie sa iyang kotse paingon sa Q3 Motel nga iyang kinaham. (Sumpayan)