Ang mga mananangko

Hilabihang sukoa ni Isyot, sa dihang iyang nasuta nga napulo gyud ka mga punoan sa mga lubi nga iyang gipangsanggutan ang gipangtangko. Wala hinuon pasipad-i ang mga sawod ug ingon man ang mga bungol. Gani, gipamalik man sa pagsanggab ang mga sawod, ngadto sa bungol.

Sa tan-aw ni Isyot, morag inantigo gyud ang gibuhat sa mga mananangko. Kay gipahimutang man pagbalik ang mga sawod. Ug gibinlan pa og diyotay nga tuba, aron kaha ingnon nga wala kini tangkoa. Ug mikutod lang gayud ang tuba. Maong diyotay ra.

Ug nasabot usab niya, nga haniti gyud sa pagsakag lubi ang mga nagtangko sa iyang sanggutan. Tiaw mo bay makahimo pa sa pagbasyar sa tuba gikan sa sawod ngadto na sa ilang gidala nga sudlanan. Mao man goy pagtuo ni Isyot, nga nagdala nang daan og kabasyaran sa tuba, ang mga mananangko didto sa itaas sa lubi. Ug wala nalang panad-a ang mga sawod didto sa ubos.

Morag wala na ganahi nga mosaka si Isyot sa uban niyang gisanggutan. Nahanugon man god kaayo siya sa tuba nga gipanangko. Ubay-ubay man gyud unta kini. Ilabi na kay hinuba kaayo ang iyang mga gisanggutan.

Samtang nagbasyar si Isyot sa tuba gikan sa kawit ngadto na sa taro nga maoy iyang pundohanan, nagsigi gihapon siya’g hunahuna, sa gidangatan sa napulo niya ka mga sanggutan. Gani, nagpangagot pa ang iyang mga ngipon sa tumang kalagot.

Ug sa samang higayon, natawo dayon diha sa iyang hunahuna, ang usa ka laraw. Usa ka paagi ang iyang nahunahunaan, aron lang gayud makabawos siya ngadto sa mga mananangko. Nagtuo man god siya, nga mamalik pa gyud kadtong nanagtangko sa iyang mga sanggutan. Ilabi na kay hayag pa ang buwan, inigkagabii.

Tuod man, gituman gayud ni Isyot ang iyang gilaraw. Mamatngunon kaayo siya sa iyang gibuhat, sa tuyo nga wala gyuy mahibawo sa iyang gihimo. Bisan gani ang iyang asawa, wala gayud niya pahibaw-a sa iyang giplano. Ug nagpaabot nalang siya sa tukmang higayon. Kanus-a molampos gayud ang iyang giplano.

Nianang pagkabuntag, nahibaw-an na lang ni Isyot, nga tulo ka mga batan-on nga taga ila ra usab, ang nag-unay sa pagtambal sa ilang kaugalingon. Ginamit ang usa ka klase sa tambal nga pinalit nila sa botika.

Nalukop diay sa samad ang ilang mga lapalapa. Mora kinig gipanghiwa og usa ka mahait kaayo nga butang, sama sa blade. Gani, naglisod pa sa paglakaw ang tulo ka mga batan-on. Gisakitan tingali kini sa ilang mga samad. Nga diha sa ilang mga lapalapa.

Nahimuot lang si Isyot pagkasayod niini. Ug diha pa usab niya masayri, kun kinsa diay ang nagtangko sa iyang mga sanggotan, sa milabay nga gabii. Mga silingan ra usab diay nila kini. Ug mga mananggot sab sama kaniya.

"Mirisi mong mga tontoha mo," nagkanayon si Isyot sa iyang kaugalingon, samtang nagsigig panguha sa mga mahait nga butang diha sa mga hakhak sa lubi nga iyang gisanggutan. (Kataposan)