Little black book

Gula 88

Sa dapit nga akong gipuy-an sa Philcoa, nahigala nako si Loloy, usa ka PUJ driver. Taga Surigao City siya. Minyo ug may duha ka anak. Ang rota sa jeep nga iyang gimaneho mao ang Fairview-Philcoa (vice versa).

Usa ka adlaw niana (day off nako), nagpatuon ko ni Loloy pag-drive og sakyanan. Naatol sab nga wala siya mamasahero niadtong tungora kay wala pa niya malukat ang iyang lisensiya nga gisakmit sa traffic enforcer gumikan sa violation nga iyang nahimo sa mga lagda sa trapiko.

Aron gayod mahanas ko sa pagmaneho’g sakyanan, nagpatuon na sab ko ni Loloy pag-abot sa lain kong day off. Nagsubay-subay lang mi sa dili kaayo busy nga dalan sa Philcoa sa akong pagpraktis og maneho.

“Mas maayong mokuha ka’g driver’s license, Joe,” sugyot ni Loloy dihang maantigo na gyud kong mo-drive. “”Akoy bahala. Student’s permit pa man ang una. Pero maniobrahon nato aron makakuha dayon kag plastik. Magpatabang tag fixer aron di ta maglisod sa atong transaction sa LTO.”

Misanong ko sa sugyot ni Loloy. Tuod man, gihimo namo ang iyang nahunahunaan. Ug nakabaton na gyud ko’g driver’s license.

Pinaagi ni Loloy, gikaila nako si Mila, usa ka nursing student. Managsilingan sila si Loloy ug Mila. Guwapa kining babayhana.

“Panguyabi nang babayhana, Joe,” ni Loloy pa.

Kay naibog man sab ko ni Mila, gipangulitawhan ko siya. Wala ko magdahom nga sugton dayon ko niya. May pagtan-aw diay usab siya nako.

Usa ka gabii niana, paggawas nako gikan sa trabaho, midiretso ko sa unibersidad nga gitunghaan ni Mila. Tayming gyud nga maoy paggawas niya sa unibersidad sa akong pag-abot. Gidapit ko siyang mangaon mi sa gawas.

Human sa pangaon nakigpamauli na siya. Mitando ko. Nanggawas mi sa kan-anan. Nanakay mi’g taxi. Gihunghongan nako ang driver. Mao nga imbes modiretso mi sa Philcoa, “biglang liko” mi sa usa ka motel. -- Sumpayan pa