Wrong number

Hello. Good morning ni Miss Marjorie Arcilla, nga head sa Human Resources Department sa University of San Sebastian, ning dakbayan. Nipasiklap siya sa wall clock nga nagpasabot nga alas nuybe ron sa buntag.

Naglingkod siya sulod sa iyang opisina nga air conditioned. Gidayal niya ang numero sa telepono nga gihatag sa usa ka applicante, nga gisulat sa iyang application letter. Dihang nibagting ug may nipunit sa telepono, nitingog dayon siya.

“Yes, unsay ato?” tingog sa hamtong lalaki sa pikas linya.

“Puede nako makahinabi si Mr. Dante Cordova?” ni Marjorie.

“Sorry, wrong number” matud sa lalaki sa pikas linya.

“Just a minute, Sir, Di man tingali wrong number kay mao man gyud ning numeroha ang gihatag nga contact number sa application ug bio data ni Mr. Cordova” ni Marjorie.

“Well. I don’t know a certain Mr. Cordova in this office. This is a law office. I am Atty. Fernando Lapaz, the lawyer in this law office. Connected with this office are only my wife, Abeth and secretary Glenda Tibon. Ngano man diay nga gusto kang makighinabi ni Dante Cordova?” sa abogado.

“Nangaplay man gud ni si Mr. Cordova og teaching job sa among eskuylahan,” ni Marjorie.

“Ah kadiyot lang kay mangutana kos akong sekretarya kun may nailhan ba siyang Dante Cordova. Kay nakadungog ko nga may silingan ming maestro nga Dante. Ambot og Cordova bay apelido niini” sa pikas linya.

Apan daw may kalagot ang tunada. Nadungog ni Marjorie nga gibutang kadiyot sa lamesa ang telepono. Ug may gipangutana ang abogado.

Nasayran dayon ni Marjorie nga ang law office ni Atty. Lapaz naa sa sulod sa compound ni Mr. Michael Damayo sa barangay Talamban. Si Mr. Damayo dunay bakery nga gitauran og extension sa telepono ni Atty. Lapaz. Luyo sa bakery may upat ka door nga apartment gipanag-iya gihapon ni Mr. Damayo. Nag-abang og usa ka door si Dante didto. Unya tiggamitan diay si Dante sa extension nga telepono kun wa si Atty. Lapaz sa iyang bupete. Unya, wa mananghid ni Atty. Lapaz, si Dante nagbuotbuot lag hatag sa maong numero sa telepono aron matawag siya.

“Abi nimo, kana si Dante Cordova feeling high society. Taas siya sa iyang pagtoo sa iyang kaugalingon. Di siya tigpanagad sa iyang mga silingan. Nagtuo siya nga ubos niya ang mga silingan niya, kay magtutudlo siya unya lantip iyang pangutok. Bisa’g sa tag-iya sa compound, di siya managad. Nagtuo siya nga under niya ang mga tawo dinhi. Mao nga wa siya mananghid nako, tataw nga way respeto sa iyang isig-katawo, nga gihatag niya ang telepono aron siya matawag. Ok ra ko kun mogamit siya’s telepono, manawag. Bisa’g di siya mananghid. Pero kanang gamiton niya ang numero, ipanghatag aron modawat siya’g tawag ining teleponoha, lain na nang istorya. Daw hari siya nga way korona! ni Atty. Lapaz sa sipa nga tingog.

“Bitaw. Ako unta siyang interviewhon sa telepono. Maayo ra ba unta iyang resume” ni Marjorie.

“Apan bad shot siya sa kinaiya. Wa siya’y tarong pamatasan. Isip maestro o magtutudlo, unsa may iyang ikatudlo sa iyang estudyante sa GMRC. (Good Manners and Right Condut) kun wa siya niana?” ni Atty. Lapaz.

“Mao lagi” ni Marjorie. Gianugnan sa applikante.

“Si Dante Cordova usa ka trespasser. Giangkon niya ang telepono nga iyaha bisa’g wa siya magtampo og usa ka dako sa bayranan sa PLDT. Wa siya’y pananghid sa subscriber. Nakayatak siya sa katungod sa uban. Iyang gibuhat violation of right to privacy and usurpation of the possession of my own telephone. Siya maestro lang apan naghawodhawod na sa tibuok silinganan. Ako abogado, wa gyud ko’y gihawodhaworan diri. Mao na nga kun gusto gyud kang makig-estorya ni Dante, akong tawgon? Pero nia man koy wireless diring telepono, ibunal ko una ni sa iyang agtang, una nako ipagamit niya ni Atty. Lapaz. Malagoton.

“Ay na lang, Sir. Sorry nga naistorbo ka,” ni Marjorie.

“Way problema” sa abogado. Nagdungan sila’g butang.

Nagmug-ot ug nagminghoy si Marjorie nga nagpaklipakli sa application letter ug bio-data ni Dante. Unya pagkahuman, gipilo niya’g kaupat ug gihulog sa trash cash ilawom sa iyang lamesa. Namapha siya’s iyang kamot. Nga daw may kagaw ang maong papeles.

“Maulawan  man lang ta adtong aplikanteha,” tuaw niya. Ug nipakli siya’g balik sa folder nga gibutangan sa mga application letters sa ubang applicante. (Kataposan)