Internship experience

Gula 6

Tungod sa grabeng pasalig ni Rex kang Cherry nga iya kining pakaslan, nahanaw ang kabalaka sa Mass Com intern.

Hangtud nga nasundan pa g’yud og makadaghan nga higayon ang panagdulog nila ibabaw sa kama. Miabut gayud ang gikahadlokan ni Cherry – mimabdos siya.

Wala siya ganahi nga mosulod sa iyang klase hinoon miadto siya sa opisina ni Rex sa City Hall. Gitug-anan niya kini nga nagsabak siya basi sa resulta sa pregnancy test.

Nasabtan ni Cherry nga wala mahimuot si Rex sa iyang gitug-an. Mikisdom hinoon ang dagway ni Rex ilabi na dihang gisukna siya ni Cherry kun unsay ilang buhaton.

“Sigurado g’yud nga kasab-an ko’g maayo sa akong mga ginikanan kun masayud na sila sa akong gidangatan Rex gawas lang kun imo ko nga pakaslan,” ni Cherry pa.

Nangutkot sa ulo si Rex. Nangagho. Dayon gitug-anan niya si Cherry sa tinuod.

“Cher, ang tinuod minyo na ko. Dili na ako ulitawo ug dili na ako makahimo pagpakasal kanimo,” matud ni Rex.

Daw liti sa udtong tutok ang pulong ni Rex nga nadungog ni Cherry. Wala dayon siya makatingog. Mga luha nangambak sa iyang mga mata.

“Giilad ra diay ko nimo aron g’yud nga maangkon mo ako hangtud nga mapul-an ka na nako. Gabaan ka pa unta Rex,” naghilak si Cherry nga migawas sa opisina ni Rex.

Migradwar si Cherry sa iyang kurso nga daku na kaayo’g tiyan. Nalipay na lang siya kay bisan sa nahitabo kaniya pabilin nga wala siya talikdi sa iyang mga ginikanan.

Paglabay sa pipila ka buwan, gipanganak ni Cherry ang usa ka himsog nga batang lalaki. Gipangga kini’g maayo ni Cherry ingon man sa iyang mga apohan kay una nila kining apo.

Hangtud nga usa ka buntag, nadungog nila sa balita sa radyo nga si Rex nadakpan sa mga ahente sa National Bureau of Investigation (NBI) nga nangilkil og kwarta sa usa ka magbubuhis.

Basi sa balita, susihon usab sa NBI ang pag-angkon og mga katigayonan ni Rex nga wala motukma sa iyang sweldo. Mga kauban niini sa trabaho miapil sa pagtestigo sa iyang mga binuang.

Nakahukom si Cherry nga bisitahan si Rex sa giprisohan kaniya. Apan didto nag-abot sila ug ang asawa ni Rex.

Nahitabo ang dakung away nila ni Rex ug sa iyang asawa nga nasayud nga nakabaton kini’g anak sa laing babaye. Wala na gayud balika ug duawa si Rex sa iyang asawa.

Nakabawos tinuod si Cherry kang Rex apan nagpabilin ang iyang kasinatian dihang usa pa siya ka Mass Com intern.   (Kataposan)