Internship experience

Gula 3

Gikan nga naghukdong sa lamesa, miirag si Cherry sa iyang gilingkoran nga silya.

Samtang gikan nga naghapohap sa buhok ug sa buko-buko ni Cherry, ang tuo nga kamot ni Rex miagbay na sa tuo nga abaga sa Mass Com intern.

Wala gihapon mopalag ang dalaga nga giagbayan na siya ni Rex. Hinay-hinay na nga gipisil-pisil ni Rex ang tuo nga aping ni Cherry.

Dayon ang wala nga kamot ni Rex gipunit niya sa baso nga may hamabaw pa nga red wine, unya iya kini nga gitungab.

Gipunit ni Rex ang baso ni Cherry nga duna pay sulod nga red wine nga diha sa iyang atubangan, dayon siya ang mipainom niini sa dalaga.

Human og lad-ok ni Cherry sa red wine, miatubang siya ni Rex nga nagsud-ong kaniya nga miinom sa red wine. Mipahiyom si Cherry, unya inanay siya nga gihagkan sa opisyal sa City Hall. “Hala, manghawok ka man Sir. Kuyaw og may makakita nimo unya makatug-an sa imong asawa daku g’yud nga away,” matud ni Cherry apan wala siya masuko.

“Dili pa ako minyo Cher, single pa ko ug walay gikahadlokan kun dunay makakita nga gihagkan ko ikaw. I love you Cherry,” ni Rex pa nga migakus na sa Mass Com intern.

Wala g’yud makatingog si Cherry nga gipangulitawhan siya sa opisyal sa City Hall. Mitungab siya og laing lad-ok sa red wine dayon mitindog ug mihagad ni Rex nga manayaw sila.

Daw nagka-sweet na ang ilang mga lihok. Human sa mga lima ka gutlo, mibalik sila sa ilang lamesa ug miinom na usab og red wine.

Mideritso na’g agbay si Rex kang Cherry. Gisibog niya’g gamay ang iyang lingkoranan sikit sa gilingkoran ni Cherry. Iya na nga gipasandig si Cherry sa iyang dughan.

Sanglit may pagka dim ang suga nga lainlain og kolor sa diskohan, walay kukauwaw nga gigakus na ni Rex ang Mass Com intern.

Giusban niya kini paghawok sa aping. “Wala ka pa ba kapoya Cher? Manglakaw na ta?”

“Sige tana,” mubo nga tubag ni Cherry. Sweet na kaayo si Rex kang Cherry. Didto sa parking area, si Rex pa gani ang miabli sa pultahan sa sakyanan aron mosakay ang dalaga.

Dihang nakasakay na si Rex didto sa driver’s seat, iyang gipaandar ang makina, gi-on ang air-con. Apan wala dayon siya mopadagan.

Giagbay niya ang iyang tuo nga kamot ngadto sa abaga sa dalaga, hinay nga giganoy ang ulo niini ug gihagkan si Cherry sa ngabil.

Daw bato-balani nga giganoy si Cherry ug wala gayud makabalibad sa gihimo kaniya ni Rex. Daw nangurog ang iyang kaunoran dihang gi-lips-to-lips na siya sa opisyal sa City Hall. (Sumpayan pa)