Internship experience

 Gula 1

Mapanagan-on kaayo ang 20-anyos nga MassCom intern nga si Cherry nga misulod sa opisina sa usa ka opisyal sa kagamhanan nga buot niya ma-interview karong buntaga.

Intern si Cherry sa usa ka radyo ug gitahasan siya sa news direktor nga mohimo og estorya kabahin sa pagdagsang sa mga squatters ingon man mga makililimos dinhi sa dakbayan.

Gihatagan siya og mga "pointers" sa news direktor kun unsay mga angay'ng ipangutana sa opisyal. Aron dili kaayo masabtan nga nagtamod siya sa inandam nga pangutana, gisag-ulo na ni Cherry ang mga pangutana.

Bisan og may kaanyag nga ikapasigarbo si Cherry apan manggi-uwawon siya nga pagka tawo kay nagtubo siya sa bukid.

Apan may pagka-kumedyante ang opisyal nga iyang gi-interview mao nga inanay ra nga nawala ang iyang kauwaw. Giabi-abi g'yud si Cherry sa opisyal ug gani giimbitar pa siya og paniudto. Mibalibad si Cherry sa pag-imbitar sa opisyal apan wala siya makabalibad dihang gipangayoan siya'g contact numbers sa iyang cellphone.

Pagka ugma gihapit ni Cherry ang opisyal kay gipasalamatan tungod kay gidayeg siya sa news direktor nga nindot ang iyang mga detalye sa estorya nga iyang gisuwat.

"Salamat g'yud kaayo sir ha? Wala nay laing balita nga akong ika-report?" sukna ni Cherry nga nagngisi.

Kuan, diay nindot nimong suwaton Cher," matud sa opisyal dayong kuha sa mga dukomento gikan sa iyang lamesa. "Kabahin kini sa sindikato sa mga tong collectors dinhi sa dakbayan nga gipaluyuhan og polis."

Naikag kaayo si Cherry sa maong inpormasyon nga duna pay dukomento nga nagsuportar. "Hala kanindot ana Sir uy!" nahinangop kaayo ang Mass Com intern. "Ang maayo tingali Cher nga magkuyog kita unyang gabii para makita gayud nimo kining maong sindikato," matud sa opisyal.

Miuyon si Cherry nga mouban sa opisyal inigka-gabii. Wala niya pahibaw-a ang news direktor sa radyo diin didto siya mag-intern kay gusto niya nga i-surpresa ang daku niya nga expose.

Tuod man, nagkita sila ug ang opisyal sa City Hall. Misakay sila sa sakyanan sa opisyal ug gisubay nila ang dalan Colon. Hangtud nga miabut sila sa eskena Colon, P. Lopez ug Osmeña Boulevard.

Gitudlo sa opisyal ang mga tawo nga maoy tigpangayo og kwarta gikan sa mga drayber sa PUJ. Nakita g'yud tuod ni Cherry ang pipila sa maong mga tawo nga miduol ug nangayo'g kwarta sa mga drayber. Dayon naabtan nila ang usa ka police patrol car nga mihunong ug usa niadtong mga tong collectors miduol ug dunay gitunol. (Sumpayan pa)