Punoan sa Sambag

Gula 8

Nananghid si Letty sa iyang agawon nga moundang na sa pagtrabaho ug gihimo niyang rason nga siya ang pabantayon sa iyang mga ginikanan sa ilang tindahan.

Dali siya nga nanghipos sa iyang mga sapot. Dili siya buot nga maabtan ni Manny nga mopahawa. Niining iyang paglarga pauli sa ilang dapit, gibawon ni Letty ang kahiubos ni Manny.

Apan nagbilin siya’g suwat nga nagdala og pagmahay alang kang Manny nga gipahatag niya ni Nang Carmen.

Nakasakay dayon og bus si Letty paingon sa ilang dapit. Sagol kahinam ug kabalaka ang iyang gibati.

Naghinam-hinam siya kay ikakita na niya pagbalik si Nestor nga wala gayud niya bawsi sa iyang mga suwat. Apan diha usab sa iyang huna-huna ang iyang sitwasyon nga nakasala sa ilang relasyon. Gani mabdos na siya ug duha ka buwan sa liwat nila ni Manny. Masub-anon si Letty samtang nagdagan ang gisakyan niya paingon sa lungsod sa Bogo.

Pag-abut niya sa Kilometer 93, nanaug si Letty. Misakay siya og “habal-habal” paingon sa barangay Anonang Norte.

Natingala ang iyang mga ginikanan sa kalit niyang pagpa-uli. “Dunay nakapahibalo nimo Day,” pangutana sa iyang inahan. “Sa unsa Nay? Miuli ko kay dili na ko gusto nga motrabaho pa didto sa syudad.”

Nagkatinan-away ang iyang mga ig-agaw nga misugat sa iyang pag-abut. Apan usa sa iyang mga ig-agaw nangutana g’yud. “Nagbuwag na kamo si Nestor gaw?”

Wala na motingog pa si Letty. Kay hapon na lagi, nananghid siya kay gusto niya nga moadto sa punoan sa sambag, ang ilang abutanan ni Nestor.

Mingaw na ang maong dapit, apan may nakita siya nga dunay gikulit sa punoan sa sambag. “Gimingaw ko kanimo kanunay Letty. Bye.”

Daw kalit lang dunay misakdap nga kahingawa sa kasing-kasing ni Letty alang sa iyang hinigugma nga iyang gibudhian, wala na niya bawsi sa iyang mga suwat. Giapas si Letty sa iyang duha ka ig-agaw. “Gaw wala ka pa diay masayud?” matud ni Oscar.

“Sa unsa Gaw,” gisukna ni Letty si Oscar. “Patay na man si Nestor, naghikog kay kuno nalimot ka na kaniya. Ugma na ang lubong niya gaw.”

Daw mitad-og ni Letty ang tibuok kalibutan sa iyang nadungog. Kalit lang miambak ang mga luha sa iyang mga mata. Midagan siya paingon sa ubos sa bungtod subay niadtong dalan-dalan nga paingon sa balay nilang Nestor.

Ibabaw sa lungon ni Nestor, halos giitos ni Letty ang iyang mga luha nga nangayo’g pasaylo sa iyang nahimong sala. -- Katapusan