Tambal sa hubak

Alas singko sa hapon. Wala nay estudyante nga nanguha sa ilang Transcript of Records. Tingale, sila nakasabot nga mosira na ang among opisina. Hinungdan, nga kaming mga working students, mihinayhinay na la’g panghipos sa mga importanteng papeles nga igsusulod sa iya-iyang mga payil.

Samtang nalingaw ko’g suksok sa mga dokumento didto sa kabinet, giduol ko sa among labaw ug midalikyat siya sa pakighinabi nako. Suod man god mi. Gani, dili siya magpatawag nakog "Sir". Parts lang kuno, okay na!

60 anyos na kining akong amigong Assistant Registrar, pero abtik pa gihapon siya sa sex. Mahilig siya mohigop og sabaw sa kaadlawon.Mao nga pirmeng presko ang iyang hunahuna. Gaan kaayo iyang buot sa opisina. Sige lag pahiyom. Hinungdan, nga pinangga siya sa mga estudyante.

Hubakon ang iyang asawa. Aduna silay pharmacy. Unay sa tambal. Pero niya pa: "Wa ko magsalig sa resita sa doktor, Parts. Anaa koy laing paagi sa pagtambal sa sakit ni misis."

"Unsa man, Parts?" Maikagon kong sukna.

Mipahiyom siya. "Sus, simple ra kaayo. Makalingaw pa."

"Unsa man lagi, Parts. Sultii ko." Subli kong pangutana.

"Ay, daaa ... higop ra god og sabaw sa gabii. O kun dili, sa kaadlawon." Niya pa nga nagkatawa.

"Unsa mang sabawa, Parts?" Nako pa nga naglibog.

"Unsa pa mang sabawa. Di, sabaw ni misis." Unya may gihunghong siya nako.

"Yamat ra, Parts?" Tuaw ko nga nagduhaduha pagtuo sa iyang gisulti. Miingon man god siya nga ang gitambal niya sa hubak sa iyang misis mao ang pakig-sex niini kanunay. "Sex with action. Dili kay without. To be acrobatic on bed is highly recommendable. Habwa god ang plema ni misis." Haskang katawaa nako sa iyang gitug-an. Sa sinugdanan, wa gyod ko motuo niya.

Pero dihang namatay ang among silingan nga hubakon sa edad pa lang nga 32, morag nakombinser ko sa gisulti sa akong amigo. Kay ang maong babaye, dalaga pa. Ug sukad masukad wa pa gyod makasulay og pakighilawas. Guwapa ra ba unta. Nindot og lawas. Unya hamis pa gyod kaayo’g mga paa. Grabe lang ka istrikta. Mao nga wala gyoy lalaking nakaduol. May mga palakero ug mga palahubog ang misulay pag-atraka. Wala silay nahimo, uy. Tanan, basted!

Sus, kun naminyo pa lang to siya, no? Unya gisigeha’g higop og sabaw sa bana, tingale, buhi pa unta kadto siya hangtod karon. Kay ang asawa sa akong amigo mo-70 na niining tuiga. Ug ang sakit sa hubak, nawala na! (Kataposan)