Little black book

Gula 73

Tungod sa kamatayon ni Tatay Merto, napugos ko paghunong sa akong pagtuon. Dili na man makadispaser ang kinitaan ni Nanay Piya sa pagpanindag puto ug sikwate sa Carbon alang sa mga galastohan sa akong pag-eskuyla. Gitingob na lang nako ang akong panahon sa pag-abag ni Nanay sa pagpaninda sa Carbon alang sa among panginabuhi.

Apan wala madugay, ingon sa nagkagamay ang among kita sa pagpanindag puto ug sikwate. Nag-anam man gud og kadaghan ang among mga kakompetensiya. Maong nagsabot mi si Nanay nga mamauli mi sa Santander. Ibilin ko siya sa akong magulang kay moadto ko sa Manila aron manarbaho.

Misugot si Nanay sa akong plano. Namauli dayon mi sa Santander. Midiretso mi sa gipuy-an sa akong magulang. Gidaygan dayon nako ang akong igsuon bahin sa gikasabotan namo ni Nanay. Maayo kay nakasabot sab ang akong magulang ug ang iyang asawa sa akong tumong ug nisugot sila nga motipon pagpuyo si Nanay Piya kanila.

Milarga dayon ko paingon sa Manila. Wala na gani ko makapananghid sa tulo nako ka girlfriend nga nag-eskuyla sa siyudad sa Sugbo -- sila si Anita, Sarah Jane ug Cynthia. Dinalian ang akong pagbiya sa Sugbo. Mora bag dako gyud kaayo’g kausaban nga nahimo sa akong kinabuhi ang kalit kaayong kamatayon ni Tatay Merto.

Sa didto na ako sa Manila, nangaplay dayon ko’g trabaho. Maayo gani kay gibuligan ko sa kahitas-an. Nakasulod dayon ko’g trabaho sa usa ka general services agency. Na-assign ko sa usa ka dakong mall sa Cubao, Quezon City ilawom sa general services department niini.

Enjoy ko sa akong trabaho. Minimum sab ang suweldo. Kadali ra kong naka-adjust sa kinabuhi sa Manila. Wala madugay, nakakita ko’g paagi sa pagpadayon sa akong sex adventures sa didto pa ako sa Sugbo. -- Sumpayan pa