Anino sa kulto

GULA 53

“Unya, Carlo,” sa hepe pagkilab sa pipila ka daklit. Mamalik na kami sa kuwartel. Himoan ko pag report kining hitaboa.”

“Sige, Dick,” ug gipig-it ni Carlo ang kamot sa hepe.

Sa dayong angkas sa hepe sa lingkoranan sa atubangang bahin sa sakyanan, milingi kini kang Carlo. “Bisitahi unya ko sa akong buhatan, Carlo, kun makahigayon ka.”

“Areglado, Dick,” sanong ni Carlo.

Human makakaon sa pamahaw nga gipangunayan niya paghikay, si Carlo miirag sa sopa sa sala. Nagpahuwas siya sa gibating kabusog. Nanukhi.

Napaod ang iyang panan-aw sa pamantalaan nga gipatong sa gamay’ng lamesita. Iya kining gipalit sa usa ka news stand sa merkado kaganina sa dayon niyang pauli sa balay gikang nagsusi sa dapit diin nakaplagan ang bata nga gipatay. Wala pa niya mabasa ang maong pamantalaan.

Gikab-ot niya ang pamantalaan. Gisuhid niya ang atubangang panid niini kun unsay nag-unang balita sa kaulohan ug sa ubang dapit sa nasod. Unya, nakignat siya sa headline nga nabasahan: Religious Cult Active in RP. Nadapit ang iyang pagtagad sa maong news item. Gibasa niya kini.

Ang Tambayawan Black Brotherhood diay ang kulto nga gihisgotan sa balita. Misamot ang iyang kasibot sa pagbasa sa maong balita. Nahinumdom siya karon nga sakop sa maong kulto ang misteryoso niyang kaaway. Busa maduluton niyang gibasa ang katibuk-ang estorya sa balita. Namasin siya nga makahagpat og kasayoran nga makatabang kaniya pag-ila sa misteryoso niyang kaaway.

Unya, dihay bahin sa balita nga nakapauknol kaniya. Nahaisa ang iyang kilay. Ug nahinumdom siya kang Maj. Dick Campo. Gibutang niya ang pamantalaan ug nakahangad siya sa kisame. Dihay iyang gihunahuna.

Pagkilab sa pipila ka daklit, kalit niyang gipunit ang pamantalaan dungan ang pagtindog. Migawas siya sa balay. Human kaserad-i ang pultahan, dihadiha misakay siya sa iyang awto. Moadto siya sa buhatan ni Maj. Campo. May itaho siya sa kapolisan sa lungsod sa Mabini. -- Sumpayan pa