Ang sigben ni lolo Boter

Ngitngit ang kagabhion karon dinhi sa bungtod, diin tingog lamang sa gangis ang sagad mabati sa palibot. Buot ni Boter nga isuroysuroy ang iyang mga apong mibakasyon gikan sa siyudad.

“Aljur!!!” ni Boter pa nga may gisangpit. Unya may migawas sa tangkal nga anaa nahimutang sa ilang silong. Ingon sa usa ka itoy nga iro apan talinis kaayo kini og simod nga walay ikog. Miduol kang Boter ang itoy’ng nagpanilap sa iyang tiilan. Gipikpik niya ang sampot niining itoy ug diha-diha dayon mitubo kining mitupong sa punoan sa mansanitas nga anaa sa ilang tugkaran. Dako kaayo kini nga susama na usab ang panagway sa usa ka kanggaro nga sagad makita sa Australia, apan wala lang gayod kini ikog. Mas dako ang dapi-dapi niini kay sa lawas ug adunay bulsa sa tiyan.

“Dali na kamo mga apo kay manakay na kita,” ni Boter sa iyang mga apo. Unya gitagsa-tagsa niya sila sa pagpahimutang sa may bulsa sa tiyan sa iyang binuhi una pa siya misunod pagsakay. Nagsuot sila og gagols aron dili sila mapuling kun ugaling adunay gagmay’ng mananap nga mosugat sa ilang mga mata.

Unya gimandoan ni Boter ang iyang binuhing si Aljur sa paglukso aron sa paglupad, ug sa usa lamang ka sikad niini sa iyang tiil miabot sila sa panganod. Kusog kaayo kini sama sa usa ka kilat. “Unsa man diay ning atong gisakyan Lo?” sa apo pang si Unyot. “Ganina sama lang kini sa itoy nga kalit lang midako unya nausab ang panagway ug karon milupad ug ato nang gisakyan,” dugang pakisayod sa apong puno sa kahibulong.

“Mao kini ang gitawag og sigben mga apo,” ni Boter pa. “Usa kini ka engkantohanong hayop nga sagad makaplagan sa langub. Apan dili sayon sa pagkuha niini kung wala kay insaktong urimos o gamhanang pulong, tungod kay siguradong paakon ug patyon tawon ang buot mokuha niini,” dugang pa ni Boter.

“Di ba dautan man kining mga sigben lolo?” sa apong si Enting nga buot usab makisayod kabahin niining mananapa.

“Magdipende ang kinaiya sa sigben sa kinaiya sa tawo na nagagalam kaniya. Kung buotan ang tawong nahimong agalon, buotan usab ang iyang sigben. Apan kung kawatan ang agalon, manduan usab niya kining mangawat ug kung ungo ang agalon, gamiton usab niya kini sa pagpamalbal,” matud pa sa apohan.

 “Adunay mga sigben usab nga kalibunanon, walay nanag-iya o nagbuhi kanila nga mga tawo. Delikado kaayo kini silang makapaak tungod kay sa pipila lamang ka minuto mokatap ang lala sa tibuok kalawasan sa mapaakan ug kung dili kini madali sa pagtabang ug pagtangtang segurado gayong bugto ang kinabuhi niini,” dugang pasabot ni Boter sa iyang mga apo.

“Karong nasayod na kamo kabahin sa sigben, unsang dapita ang buot pa ninyong maadto nato?, sa apohan pang si Boter.

“Sa Switzerland lolo Boter, hehehe!” tiaw pa sa yagayagaong apong si Timyong.

Unya giisa sa sigben ang iyang mga kamot ug mibukhad ang pako nga sama sa kabog nga nagpilit ra usab sa iyang kilid. Misamot kini kakusog sa paglupad sa dihang gikapakapa na sa sigbeng si Aljur ang iyang mga pako. Ug hilabihang lipaya sa mga apo ni Boter nga nakasinati sa pagsakay sa talagsaong sigben. (Kataposan)