Duha ka sugilanon anak, ania ang imong amahan

CEBU, Philippines - Uha! Uha! Uha! Nadungog ang hilak sa bag-ong natawo nga bata didto sa charity ward sa ospital.

“Lalaki ang imong anak Mrs. Sarah Algarme,” matud sa komadrona una mogawas. Gisugat dayon kini ni Abraham.

“Unsay kahimtang sa akong asawa, ma’am -- mahimo ko na siyang ikasulti?

“Mahimo na sir, sulod lang.”

Didto sa sulod, daghang mga kama apan pulos okupado ug sa dapit sa daplin, didto ang kama ni Sarah.

“Unsay i-ngalan nato sa atong anak, Abe?”

“Ikaw, unsay imong gusto?” sumbalik pangutana ni Abe.

“Gusto ko Biblical.“

“O, sige Biblical total Biblical man sab tang duha. Okay ba nimo ang Isaac?”

Nagkauyon ang duha sa ngalan sa bata, ug midako kini sa kaharuhay ug pagpangga kay bisan kabos ang magtiayon, maayong mangita og panginabuhian si Abraham. Sama sa Isaac sa Biblia, wala masundi si Isaac.

Milabay pa ang mga tuig, ug mi-asenso ang negosyo nga gisudlan ni Abraham. Nakapalit sila og mga kabtangan ug mga bag-ong sakyanan. Apan kun unsa kakusog ang asenso ni Abraham, mas kusog pa niana ang pagwaldas ni Isaac. Na-ut-ot sa hinay-hinay ang ilang katigayonan.

Unya, giatake sa kasingkasing si Abraham nga maoy hinungdan nga naparalisado kini. Tungod sa kaguol, pila lang ka semana ang milabay, namatay si Sarah. Didto sa laing dapit si Isaac kauban ang iyang mga babaye sa dihang nabalitaan niya nga namatay ang iyang inahan.

Nalubong na si Sarah sa pag-abot ni Isaac ug maoy misugat sa iyang panan-aw ang iyang amahan nga naglingkod sa silyang may ligid.

“Gi-atake ako nga maoy hinungdan sa kamatayon sa imong inahan nga wala ka gani makatambong sa iyang haya,” midaligdig ang mga luha sa tigulang nga namulong.“Imong giwaldas ang atong katigayonan. Wala koy lain nga ikabilin kanimo kundili kining balay ug ang Biblia nga anaa sa lamesa.”

“Mi-ubo og kadiyot si Abraham ug nabugtoan kini sa gininhawa.

Sa labihang kaguol, naghikog si Isaac kay wala nay nahibilin kaniya. Namatay siya nga wala masayri nga didto gisukip sa Bibliya ibabaw sa lamesa ang librita sa usa ka banko sa Amerika nga may thirty million dollars siya. (Kataposan)