Anino sa kulto

GULA 51

Naikag si Carlo pagsusi sa maong hitabo. Sakay sa iyang awto, nag-inusara siyang miadto sa crime scene. Naintriga siya niining hitaboa. Sagunson na nga may bata nga gipatay sa lungsod niyang natawhan, butang nga dili ginhapon niadtong panahon nga bata pa siya.

Daghan nang mga tawo sa dapit diin napalgan ang patay’ng lawas sa bata sa iyang paghiabot. Diha na ang sakyanan sa kapolisan. Gipahunong niya ang awto ug nanaog. Miduol siya sa gipunsisokan sa katawhan didto sa unahan. Miuliot siya sa daghang mga tawo nga midugok pagtan-aw sa bata nga gipatay. Tuod, nakita niya ang bata nga giugkat na sa kapolisan. Ang mga tinugyanan sa balaod padayon pang nagsuhid sa dapit nga ilang gilatiran og pisi. Nanghipos sila’g mga butang nga magamit sa pagahimoon nilang imbestigasyon.

Naigking si Carlo dihang may kamot nga midapat sa iyang abaga. Nahalingi siya. Maoy misugat sa iyang mga mata si Maj. Dick Campo.

“Nia ka sab diay?” sa hepe.

“Oo,” tubag ni Carlo. “Unsa na man sab ning hitaboa?”

“Lain na sab nga bata ang gipatay,” matud ni Maj. Campo sa maluyahon nga tingog. “Babaye gihapon.”

“Sagunson na man kini, Dick,” ni Carlo.

“Mao lagi,” sa hepe dungan ang paglingolingo. “Pastilan, gi-pressure na ra ba ko sa mayor, da. Kinahanglan kuno nga masulbad sa labing daling panahon ang sunod-sunod nga mga krimen nga nahitabo dinhi. Karon pa kuno sukad masukad nga may mangilngig nga krimen nga nahitabo niining lungsora.”

May isulti pa unta si Carlo dihang nasigpatan niya si Lt. Valera nga nagpaingon kanila. Mitimbaya ang tenyente kaniya dihang nahiduol na kini sa ilang nahimutangan. -- Sumpayan pa