Punoan sa Sambag

Gula 4

Gihatod g’yud ni Nestor si Letty didto sa national highway. Uban kanila mao ang mga ginikanan sa iyang hinigugma. Gihatagan sila’g higayon nga magka-estorya nga sila rang duha samtang nagpaabut sila sa pag-agi sa bus nga sakyan ni Letty paingon sa dakbayan sa Sugbo.

“Dili kaha ko nimo kalimtan na lang Let kun tua ka na sa siyudad?” masulob-on nga gisukna ni Nestor ang iyang hinigugma.

Giam-aman ni Letty si Nestor. “Gitugyan man gani nako kanimo ang akong labing maninungdanong butang aron pagpaila sa daku nakong gugma kanimo, laumi nga ikaw ra ang akong mahalon Nestor.”

Nahupay-hupay ang gibati nga kabalaka ni Nestor sa gipasalig ni Letty kaniya. Usa ka matam-is kaayo nga hawok ang gipabawon ni Nestor sa hinigugma dihang misakay na kini sa bus.

Apan dihang dinhi na magtrabaho si Letty sa dakbayan, inanay niya nga nakalimtan si Nestor didto sa ilang dapit. Kini ilabi na dihang nasuod niya si Manny.

Hardenero si Manny sa gitrabahoan ni Letty diin nagsilbi isip usa ka katabang. Nasabtan ni Letty nga gusto g’yud nga makigsuod kaniya si Manny kay sa panahon nga maghanduraw siya ni Nestor, moduol kini kaniya.

Pareho sila nga hilig og videoke mao nga dali ra nga nagkasuod sila si Manny ug Letty. May videoke si Manny sa iyang lawak sa basement sa balay nga gipapuy-an kaniya sa ilang agawon.Dunay duha ka kaubang katabang si Letty, apan mga edad-edaran na sila mao nga si Letty maoy gisuod ni Manny.

Usa ka higayon, birthday sa usa ka kauban nga katabang ni Letty. Didto nila gisaulog sa kwarto ni Manny kay ang kasaba sa videoke dili man madungog sa taas sa balay ug dili makabalda sa ilang mga agawon.

Nagpalit si Manny og pipila ka botelya sa beer nga ilang mainom.“Hala, dili man ko moinom og beer,” matud ni Letty. “Sige na Let, duyogan nato sa kalipay si Manang Carmen nga nag-birthday karon,” agi ni Manny kang Letty.

Nag-duet sila’g kanta si Letty ug Manny ug nalingaw kaayo ang duha nila ka kaubang katabang kay nindot kaayo nila nga pagkakanta ang Endless Love. Sa hilom nakadayeg si Letty sa tingog ni Manny kay sundog kaayo niya ang tingog ni Bing Rodrigo sa pagkanta niya sa May Pag-ibig Pa Ba. Nakahanduraw si Letty kang Nestor samtang namati sa lyrics sa maong awit.

Gitubag dayon ni Letty ang awit ni Manny pinaagi sa pagkanta sa “Sayang” ni Claire dela Fuente. Nakapanglingo-lingo si Manny nga nagsud-ong ni Letty samtang nagkanta.

Nag-duet sila’g usab si Manny ug Letty. Gikanta nila ang “Bakit Ngayon Ka Lang.” Giagbayan ni Manny si Letty. (Sumpayan pa)