Little black book

Gula 69

Nakalitan ko sa akong nadungog gikan kang Jovie.

“Unsa gud ning kalakiha, Jov?” Nakapangutana ko ni Jovie. “Nagsabot mo si Gelia nga makigbulag na mo nako?”

“Wa mi magsabot, Jose,” ni Jovie pa. “Nagkaatol lang tingali nga pareho mi’g desisyon.”

“U-unya? Ang atong sex escpades together?”

“Gikalimtan ko na ang atong kagahapon.”

“J-Jovie...”

“May lain na akong hinigugma. Sa dihang wa ka na mobawos sa akong mga suwat, gitun-an ko na ang akong kaugalingon pagkahikalimot kanimo. Sakit pero nakadawat ra ko sa kamatuoran nga di ka seryoso sa pagpakigrelasyon nako. Hangtod nga miabot si Froilan sa akong kinabuhi. Nangulitawo siya nako. Sanglit nakita man nako nga seryoso siya sa iyang pagpaninguha nako ug may respeto siya sa akong pagka babaye, gidawat ko ang iyang gugma. Hangtod karon malipayon ko sa among relasyon.”

“Nasayod na ba siya sa nahitabo tali natong duha?”

“Wa pa. Pero sultihan ko siya bahin niana inig-abot sa tukmang panahon. Di na kana imong problema. Ako nay maantigong mangitag paagi kun unsaon ko siya pagpasabot sa nahitabo sa akong pagka babaye.”

Human sa panagsulti namo ni Jovie, nanggawas na kami sa motel. Miuna siya’g gawas. Nagsunod ko niya nga huyhoy ang mga abaga. Pakyas ko sa akong tuyo niya! Demalas!

Unya, nakahunahuna ko ni Anita. Misantop sa akong hunahuna nga siya’y akong pahungawan sa napurnada nakong plano alang kang Jovie. Kay may oras pa man, miadto ko sa unibersidad nga iyang gitunghaan. Nag-atang ko sa gawas sa main lobby sa tulunghaan. Mahinamon kong nagpaabot nga mogawas si Anita. -- Sumpayan pa