Little black book

Gula 68

Nanggawas dayon mi sa kan-anan human sa pangaon. Mipara dayon ko’g taxi ug nagpahatod mi ngadto sa suki kong motel.

Walay tingog-tingog si Jovie samtang nagpa-check in mi sa counter. Hangtod sa pagsulod namo sa mabugnaw’ng lawak wala gihapon siya’y timik.

Dihang gakson ko na unta siya, nakugang ko kay kalit man lang ko niyang gitukmod. Diriyot gyud ko matumba.

“Nakamenos ka lang gyud sa akong pagka babaye, no?” Giingnan ko ni Jovie uban ang pagpasupot sa hait niyang tinan-awan kanako.

“I-I’m sorry,” nako pa. “A-abi ko bag...”

“Abi mo’g pareho ta’g hunahuna maong nikuyog ko nimo ning mabugnaw’ng dapit? Abi mo’g misugmat ang akong biga?”

Wala ko makatingog.

“Ang Jovie nga imong gikaatubang karon dili na ang Jovie nga imong girlfriend kaniadto, Jose,” nagkanayon si Jovie. “Mikuyog ko nimo dinhi aron sudyaan ka sa imong gihimo nako kaniadto. Sa imong pagtonto nako!”

“Wa ko ikaw hisabti,” nagpatuso-tuso ko.

“Ayaw na lang pagpabuang-buang, Jose. Nasayod kong ang lawas ra nako maoy imong giapas. Ug gawas nako, may lain ka pang girlfriend, si Gelia!”

Mora ko’g gibuboan og usa ka baldeng kinilis sa gisulti ni Jovie. Nasayod na diay siya nga may relasyon usab kami si Gelia kaniadto.

“N-nagbuwag na man mi si Gelia, Jov,” giingnan ko siya.

“Maayo kun mao kana,” ni Jovie pa. “Pareho diay mi’g hunahuna.”

“U-unsay buot mong ipasabot?”

“Di ka kasaligan nga pagka lalaki, Jose. Wa kay kalainan sa mga traditional politician nga maayo lang sa saad. Busa niining higayona, pormal kong bugtoon ang atong relasyon!” -- Sumpayan pa