Gula 9
Nagpasumbingay si Gloria kang Roger nga kun hatagan siya’g laing higayon andam siya nga makigtipon pagbalik sa ulitawo aron tagboon pagbalik ang nabugto nila nga pagminahalay.
Apan wala na magdugay-dugay pa si Roger sa pagbalibad sa gitanyag kaniya ni Gloria. Bug-os na g’yud ang iyang huna-huna nga dili na makigbalik ni Gloria.
“Si Carmel na maoy akong tugyanan sa tinuod nakong paghigugma Gloria. Diha unta nako itugyan kanimo ang akong kinasing-kasing nga pagmahal apan imo man lang gibinuangan,” pasabut ni Roger.
Nalugmaw g’yud ang luha ni Gloria. “Sala g’yud nako ang nahitabo Ger, mao nga mangayo unta ko nimo og laing higayon. Ikaduha, gimingaw na kaayo ko sa atong anak.”
“Buyno, makahimo ka pagduaw ni Inday tua sa ilang Mama sa Maasin, apan dili nimo siya makuha gikan kanako kay sa gidugayon sa imong pagtalikod, patay na unta ang bata kun wala nako amomaha,” bug-at ang tuno sa tingog ni Roger.
Walay tingog si Gloria nga nagpalayo ni Roger. Takulahaw lang kining nahanaw sa panan-aw ni Roger dihang misuot-suot kini sa bagang duot sa katawhan nga miduaw usab sa lubong sa ilang minahal sa Carreta cemetery.
Giapas ni Roger si Carmel didto sa lubnganan sa iyang uyoan. “Uy, dia ka na man lagi Ger. Wala diay mo mag-estorya’g dugay si Gloria? Basin gimingaw na kaayo to nimo,” sagol komedya ni Carmel.
“Buang tong babayhana Carmel,” matud ni Roger. “Nganong nakaingon ka man niana Ger,” nangutana si Carmel.
“May nawong pa uro’y siya nga nakalitok nga andam siya’ng makigtipon pagbalik nako,” saysay ni Roger.
“Diay ba… unya giunsa nimo pagtubag,” sukna ni Carmel. “Akong gidiritso pagbalibad. Dili na siya angay kanako kay salingkapaw ra ang iyang gugma.”
Pagka buntag, naminaw og balita sa radyo si Roger. Tukma g’yud nga naghatag sa headlines ang announcer nga si Jhunnex Napallacan sa DYLA.
“Usa ka babaye naghikog kay wala na makigbalik kaniya ang kanhi niya puyo-puyo!”
Mikuba pag-ayo ang dughan ni Roger. Wala g’yud siya masayop kay nadungog g’yud niya sa report nga si Gloria g’yud ang naghikog. May sinuwat kini nga tugon nga ipaatiman pag-ayo ni Roger ang ilang bugtong anak.
Nakatulo g’yud ang luha ni Roger nga namati sa balita apan wala siya magmahay sa iyang hukom kay dili niya mahimong talikdan si Carmel aron lang balikan niya ang babaye’ng mibiya kaniya tungod lang sa kakabus. (Kataposan)