Sa unang gabii sa panagtipon nila ni Roger ug Carmel, gisubli-subli nila pagdimdim ang katam-is sa gugma.
Pagka-ugma, gisungog og maayo si Carmel sa iyang mga kauban kay nabantayan nila nga luya kini ug klaro kaayo nga walay kinatulgan. Wala ilimod nila ni Carmel ug Roger nga nagtipon na sila sa kinabuhing minyo bisan og wala pa makasal.
Unya, adlaw kadto sa mga minatay, Nobiyembre 1, nagkuyog sila si Roger ug Carmel pagbisita sa mga nangamatay’ng paryente ni Roger didto sa sam-ang sa Carreta.
Wala tuyoa ni Roger nga ikasugat nila ni Carmel si Gloria nga miduaw usab tingali sa lubong sa iyang paryente.
Daw sa misiyok ang tinan-awan ni Roger nga nakakita sa dagway sa babaye nga iya untang gimahal pag-ayo apan mibiya kaniya sa tumang kasayon tungod sa kalisud.
Buot unta niya kining likayan, apan duol na sila kaayo. “Kumusta ka Roger,” daw mauwawon ang tuno sa tingog ni Gloria.
“Okay ra ko, naulian na sa grabeng kaguol sa imong pagbiya,” tubag ni Roger, dayong paila niya kang Carmel, “Mao diay kini si Carmel, ang akong pangasaw-onon.”
Mitanyag si Carmel nga biyaan lang niya sila si Roger ug Gloria aron nga sila magka-estorya og maayo. “Mouna lang ko sa lubong nila ni Tiyo sa unahan Ger, teksi lang unya ko kon human na mo’g estorya.”
Nagpadaplin sila si Roger ug Gloria niadtong luna nga minus ra og mga tawo. “Pasayloa ko Ger nga mibiya kanimo ug sa atong bugtong anak. Apan bisan og nagpalayo ko kanimo, dia wala gihapon ko mangita’g lain.”
“Sakit kaayo ang gihimo nimo kanamo ni Inday Glo, halos nako ikamatay ang kaguol sa imong pagtalikod. Halos ako mahutdi sa gininhawa pagdinagan aron lang maabtan ko nga dili pa makalarga ang barko nga imong gisakyan,” daw kahilakon si Roger nga naghandom.
Mipadayon si Roger. “Hinuon nakasala tingali ko kanimo nga wala makahatag og kaharohay sa atong pagpuyo, apan igo na ba kana nga rason nga imo kaming talikdan?”
Naghilak nga nangayo’g pasaylo si Gloria kang Roger. “Pipila ka adlaw gikan sa akong pagtalikod kaninyo ni Inday Ger, inanay nakong nasabtan ang daku nakong sayop. Apan gidaug ko sa kauwaw mao nga wala na lang g’yud ko mobalik.”
“Buyno, karon kon mohatag ka og laing higayon kanatong duha, mahimong ipadayon nato ang atong pagminahalay. Wala gihapon ako makasala kanimo Ger bisan og taud-taud na nga kita nagkalagyo,” matud ni Gloria. (Sumpayan pa)