Gugma'ng salingkapaw

Gula 5

Layo na kaayo ang barko nga gisakyan ni Gloria paingon sa Cebu dihang mibiya si Roger sa pantalan. Halos dili na gani niya makita ang suga sa barko kay padayong gibiawan sa luha ang iyang mga mata.

Huyhoy ang abaga ni Roger nga milakaw aron mopauli na sa ilang barangay sa Manhilo. Samtang naglakaw nga daw inihap ang mga lakang, inanay’ng nanumbalik sa handurawan ni Roger kadtong mga adlaw sa una nilang paghimamat ni Gloria.

Gilab-as niya kini diha sa iyang kaisipan ilabi na kadtong mga higayon nga gidimdim nila ang katam-is sa gugma sulod sa Q2 Motel.

Pagkaugma, wala makatrabaho si Roger kay wala siya mahibawo unsay buhaton tungod sa tres-anyos niya nga anak.

Gibasul usab ni Roger ang iyang kaugalingon tungod kay mga tulo ka tuig nga wala siya makahatag og kaharohay ni Gloria nga nag-antos intawon sa ilang pagpuyo. Usahay magsud-an lang intawon sila og buwad, utan o isda nga inun-onan.

Sayod siya nga kapoy kaayo ang sitwasyon sa iyang asawa kay mao pa kini ang manglaba sa ilang mga bulingon gawas sa pag-atiman sa ilang anak. Wala usab siya makapalit og gatas para sa bata mao nga mihugo g’yud ang iyang asawa.

“Angkunon nako nga mabasol usab ako sa among kalisud, apan wala ako magligoy-ligoy sa akong pagka lider sa pamilya. Nagsinaaray man unta kami si Gloria nga mag-unongay gayud. Salingkapaw ra ang gugma nimo Glo,” nakaingon si Roger.

Duha ka semana ang milabay bisan sakit unta kaayo ang pagtalikod sa iyang pinangga nga anak, apan nakahukom si Roger nga molangyaw dinhi sa dakbayan sa Sugbo ug ibilin ra sa iyang inahan ang bata.

Pipila ka adlaw nga nag-antos si Roger pag-abut niya dinhi sa dakbayan. Didto siya unang mipuyo sa gipuy-an sa iyang kauban kaniadto sa trabaho.

Dihang nadawat na siya pagtrabaho sa usa ka candy factory diha sa Mandaue, nag-abang na siya og kwarto nga iyang kapuy-an. Hangtud nga nahimo niyang suod si Carmel, kauban ra niya sa trabaho.

Wala ililong ni Roger ngadto ni Carmel ang iyang kaagi uban ni Gloria. Nalooy si Carmel kaniya.

Usa ka Domingo, nagsaulog sa founding day ang gitrabahoan ni Roger. Nangaligo sila’g dagat didto sa Duawon beach sa Marigondon, Lapulapu. Nakahigayon si Roger sa pagpaduol ni Carmel ug didto sila maligo ilawom sa pangpang.

Dakung bawod ang mihapak kanila. Nagakus niya si Carmel kay aron dili malamba ngadto sa hait kaayong bato ilawom sa pangpang. (Sumpayan pa)