Sa usa ka sam-ang sa siyudad

Maoy pagtikyop sa kilumkilom dihang nahiabot si Bino sa nitso sa mitaliwan na niyang asawa. Maoy nabatasan niya nga matag semana bisan unsang adlaw modalikyat gayud siya pagduaw sa lubong ni Emma aron pagdagkot og kandela.

Ug kay nagsingabot na usab ang Adlaw sa Kalagkalag, nagkasubsob ang pagduaw ni Bino sa lubnganan sa gihandum niyang asawa nga namatay sa sakit sa kanser sa tutoy. Ang nakapait kay sulod sa lima ka tuig nilang panag-ipon ni Emma human sa ilang kaminyuon, wa gayud sila tugahi og anak. Nabiyudo si Bino sa edad nga 30.

Gidagkotan dayon ni Bino ang dala niyang kandela. Mikibot dayon ang iyang baba.

"Emma, umaabot na sab ang Adlaw sa Kalagkalag! Apan ani, sa matag semana giduaw ko ikaw! Timaan kini sa way paghupas kong gugma kanimo!" ug unya, giliwag ni Bino ang iyang panan-aw sa palibot ning sam-ang sa siyudad nga nahimutang sa usa ka dapit sa mga eskuwater sa usa ka barangay.

Nakapanglingo si Bino sa talan-awon nga iyang nakita. May pundok sa mga lalake nga nagsugal ibabaw sa nitso. Dili halayo sa unahan, may laing pundok usab sa kalakin-an nga nag-inom og ilimnong makahubog nga langas ug sibaw na kaayo ang mga tingog.

Sa atbang nga nitso usab, may grupo usab sa mga batan-ong lalake nga naghingos og ragbi ug naghithit sa ginadiling druga.

"Pagka-way nada gayud niining sam-anga sa siyudad! Gihimong dapit nga sugalan, suyopanan, hithitanan ug imnanan sa grupo sa kalakin-an!" nagkibot-kibot ang baba ni Bino nga hinay'ng mibiya sa nitso sa iyang asawa.

"Nagsingabot naman unta ang Adlaw sa Kalagkalag, apan wa may nakabadlong nga mga barangay tanod ug mga pulis ning usa ka sam-ang sa siyudad nga gihugpaan sa mga badlungon sa katilingban....? hilom nga nakapanlitik sa iyang tudlo sa kamot si Bino nga mipadayon paglakaw.

Nakapanglingo na usab si Bino. Sa unahan og diyutay, bisan inanay na nga mihugpa ang kangitngit sa sulod sa sam-ang, ilabi na kay halayo man ang nag-inusarang poste nga gitauran og sugang dagitabnon, may laing talan-awon nga nabantang sa panan-aw ni Bino sa sulod sa sam-ang. May lalake ug babaye nga nagromansahay kilid sa nitso! Hubo ang ilang mga lawas nga nag-agumod sa tumang kakutas. Naghiyudhiyod ang duha ka hubong mga lawas nga nag-akob.

Milingiw si Bino. Gipakusgan niya ang iyang paglakaw aron makagawas na sa sam-ang. Nasayod siya nga ang mga talan-awon nga iyang nasaksihan karon sa sulod ning usa ka sam-ang sa siyudad, maundang lamang makadiyot inig-abot sa Adlaw sa Kalagkalag kay tauran naman og bombilyang mga suga ang mga nitso ug lubnganan sa mga patay. Ug unya, mokuyanap na ang kahayag sa tibuok palibot sa maong usa ka sam-ang sa siyudad, panahon sa Kalagkalag. (Kataposan)