Si Len

Si Billy nanumpa nga dili na gayod mahigugma pa pag-usab human sa ilang panagbulag og sa iyang asawa nga si Mercy. Maoy iyang laraw nga ang tanan niyang panahon iya nalang nga igugol sa pag-awit ug sa pagsulat og mga balak ug mga sugilanon.

Apan, ang iyang panumpa iyang gibakwi sa miaging bulan sa diha nga iyang nasuta nga tinuoray gayod siya nga nahigugma sa bag-o niyang nakaila nga higala nga mao si Leonora.

Si Leonora nga naila sa ngalan nga "Len" matahom, puti siya og pamanit ug may pagka mestisahon. Gani, ang iyang mga kaubanan sa trabaho nga sila si Gary, Mervin, Wendell, Gerben ug Mam Salie ug Icy motawag man kaniya nga Angel Locsin. Silbidora siya sa usa ka fastfood chain sa dakbayan sa Davao ug nakatapos sa kurso sa turismo.

Si Billy nga usa usab ka magtutudlo sa usa ka unibersidad dugay na nga mag-anhaaan sa kan-anan nga gitrabahoan ni Len apan dili sama ka subsob karon.

Kaniadto, kausa lang siya moinom og kape ug tsa apan karon kaduha o katulo na. Iya kining gibuhat kay ganahan man siya nga magsud-ong kang Len sa dugay'ng panahon.

Gani, nag-ampo si Billy nga dili na moabot ang kagabhion aron dili na mahanaw si Len sa iyang panan-aw. Klaro ug tataw nga sa matag adlaw ang iyang dughan nagpaninggit sa mga pulong "I love you, Len". Kay alang kaniya anaa siya sa paraiso kong iyang makauban si Len.

Alang ni Billy nga kun ang iyang kinabuhi usa pa ka awit si Len mao ang huni ug mga titik niini. Nasuta karon ni Billy nga si Len mao gayod ang iyang "dream girl". Kay sukad mopitik ang iyang dughan ngadto kaniya, si Len dili naman gayod malaksi na gikan sa iyang alimpatakan.

Si Len anaa sa iyang handurawan samtang siya magtudlo ngadto sa iyang mga tinun-an. Ang matahom nga panagway ni Len mao ang mopatigbabaw sa iyang alimpatakan samtang siya mag-awit ug magatagik og mga balak ug mga sugilanon. Karong buntaga, si Billy nakasaad nga kun hatagan lamang siya og higayon ni Len, ang naulahi iya gayod mga ihatod diha sa salag sa kaminyoon, mahalon og panggaon hangtod sa hangtod. (Katapusan)