Gula 59
Miduko si Anita. Mipitokpitok ang iyang mga mata.
“Nagmahay ka ba nga imong gitugyan ang imong kaputli ngari nako, Anita?” Gisukit ko siya.
“Wa man,” mubo niyang tubag. “Gilainan lang kong naghunahuna sa atong gibuhat, Jose.”
“Ngano man?”
“Tungod kay mga batan-on pa kaayo tang mibuhat ning butanga.”
“Di man kay kita ray nagbuhat og ingon niini ba. Didto gani sa America, sumala sa akong nabasahan sa usa ka broadsheet, di na big deal alang sa mga teenager ang premarital sex. Giuran-uran na ni nila.”
“Lahi ta sa mga Amerikano. Liberated sila’g hunahuna.”
“Bisan na. Katungod man sab natong malipay. Ug unsay kapuslanan sa atong pagka-conservative kun kini nagbilanggo sa atong kagawasan nga malipay? Kun kini naghikaw nato sa pagpalawom sa atong kinaadman bahin sa atong kaugalingon? Kun kini mogaid nato sa ignorance?”
Wala motingog si Anita.
“Ang importante alang nako mao nga nalipay ta, Anita,” giingnan ko siya. “Ug nga wa kay regret sa nahitabo nato.”
Wala siya motingog. Gitiwas niya’g sul-ob ang iyang mga sapot. Nagdali-dali na lang sab ko’g ilis aron makabiya na kami sa motel.
“Ang imong problema,” ni Anita pa. “Wa pa ko nimo kasultihi mahitungod sa imong problema.”
“Ayaw na lang kadto’g hunahunaa,” giingnan ko siya. “Masulbad ko man o dili, ang suliran moagi lang sa akong kinabuhi.”
Ug nanggawas na kami sa motel.
Pag-abot nako sa balay, gikuha dayon nako ang akong little black book. -- Sumpayan pa