Absuwelto

Nagtingkagol si Maloy mga usa na ka bulan karon sulod sa Talisay Detention Cell. Nabilanggo siya tungod sa sumbong lugos kon rape ni Nelia batok kaniya. Way piyansa.

Atol sa gitakdang adlaw, daghang mga tawo ang mitambong sa husay. Lakip sa mitambong mao ang mga ginikanan, paryente ug abogado sa sinumbong ug sa kihanti kun nagsumbong. Gusto lang ang mga tawo nga mamati sa husay kay ang matag habig sakop man sa inilang banay sa lungsod.

Unang pangutana sa huwes ngadto kang Nelia. “Isaysay kun unsay nahitabo kanimo niadtong adlawa!”

Tubag ni Nelia: “Niadtong adlawa sa udto, akong gihangyo si Maloy nga mobantay kanako samtang mag-review ako sa leksiyon alang sa umaabot nga nursing exam. May lakaw man gud sila si Papa ug Mama ngadto sa bukid aron pagkuha sa abot sa among uma!”

“Unsa may relasyon ninyo tali kaninyong duha, kang Maloy ug ikaw?” dason sa huwes.

“Amigo lang! Dugay na siyang nangulitawo nako apan wa ko sugta kay di pa ako andam magminyo. Mag-Nurse una ko!” Matud pa ni Nelia ngadto sa huwes samtang maikagong nagtan-aw kang Maloy nga pinaduko ang agtang.

“Unya, kay gikapoy man ko sa pag-review, miadto ko sa akong kuwarto aron mopahulay. Pila ka gutlo, kalit misulod sa akong kuwarto si Maloy ug gigakos ako. Gihagkan. Mikisikisi ako apan kusganon ang iyang gakus hangtod nga naluya ako! Maoy akong namatikdan gihubo niya ang akong panti ug unya....! “Mipakgang ang Huwes: “Ipasumbingay lang sunod nga hitabo!’

Miginhawa’g lawom si Nelia ug maulawong miingon: “Miliot gyud ang iyang pasumbingay sa ako!”

Misiga ang mata sa huwes ug nagtinan-away ang mga tawong nanambong. Hilom kaayo ang husay. Human sa pamahayag ni Nelia, sunod nga gitawag ang ngalan ni Maloy.

Sa pangutana sa huwes, wa molikwad si Maloy: “Tungod sa akong gugma kang Nelia, akong nahimo ang kasal-anan ngadto kaniya!”

Una mosumpay sa iyang pamahayag, mitan-aw si Maloy ngadto kang Nelia.

“Senyor Huwes, sa akong paglugos kaniya, mibawos man sab siya!”

Nakalitan ang huwes hastang mga nanambong. Ug mikalit pagtindog si Nelia sa iyang lingkoranan. Giduol si Maloy ug gidabodabohan sa kusnit ni Nelia dungan ang pag-ingon: “Ikaw ba’y lamian...lalim ba! Pakaulaw ka lang dah...!”

Gibira si Nelia sa iyang inahan ug ang huwes namahayag: “Husaya ninyo sa gawas una ipadayon ang husay.” Ug midokdok sa malyete ang huwes timaan nga recess ang husay.

Didto sa gawas nagsabotsabot ang mga ginikanan ni Maloy ug Nelia lakip nang mga abogado. Sumala sa gikasabutan, ipakasal ang duha ug ang talamdong Huwes maoy paludhon isip Padrino nila ni Maloy ug Nelia. (Kataposan)