Gula 1
Paspas kaayo nga nagdagan si Roger subay niadtong batuon ug nagliko-liko nga dalan sa ilang barangay kay naninguha siya nga maabtan pa ang barko nga dili pa makalarga sa pantalan sa Maasin paingon dinhi sa Sugbo.
Buot niya nga maapsan ang iyang asawa nga si Gloria nga motalikod na kaniya ug sa bugtong nilang anak kay dili na makaantos sa ilang kalisud sa panginabuhi sa Leyte.
Suwat na lang ni Gloria ang naabtan ni Roger didto sa ilang balay nga gihap-an sa iyang tres-anyos nga bugtong anak nga nagbakho-bakho intawon paghinilak nga gibiyaan ra sa iyang inahan.
“Gikasubo ko Ger, dili na ako makaagwanta sa atong kalisud sa pagpuyo. Molarga ako sa Manila kay adto ko manimpalad sa pagpangita’g trabaho.I-ampo nako ang imong maayong kaugmaon uban sa atong anak,” matud sa suwat.
Gikaila ni Roger si Gloria dihang misuroy siya sa Plaza Independencia niadtong nagtrabaho pa siya sa dakbayan sa Sugbo. Ang Plaza Independencia maoy suroyanan sa mga dalaga’g ulitawo panahon sa Domingo.
Nagtrabaho niadto si Roger isip usa lang ka yanong trabahante sa usa ka baligyaanan og mga pyesa sa sakyanan dinhi sa Sugbo.
Miduol si Roger sa usa ka tindahan sulod sa Plaza kaniadto aron mo-snack. Naabtan niya ang usa ka maanyag nga dalaga nga mipalit usab og makaon apan walay sukli ang tindera.
“Miss kun dili lang nimo hatagan og dautang kahulogan, i-apil na lang nako og bayad ang imong gipalit nga pagkaon kay aron masuklian na sa tindera,” matud ni Roger nga nagpahiyom ngadto sa dalaga.
Gibawsan og tam-is kaayo nga pahiyom sa dalaga ang tanyag ni Roger. Dayon, nag-uban sila pag-snack sa usa ka gamay’ng lamesa. Nag-ila-ila sila si Roger ug Gloria.
Human sila nag-snack, gilibut nila ni Roger ug Gloria pagsuroy ang Plaza Independencia. Nagbayloay og mga maanindot nga estorya. Hangtud nga nagkasabot nga mosulod sila sa Fort San Pedro, ang karaang kampo sa mga sundalo nga tupad ra sa plaza.
Mata’g Domingo na sa hapon sila nga magkita sa Plaza Independencia ug hangtud nga gidaygan ni Roger si Gloria sa iyang gitagoang pagbati. Tuod, wala paantosa’g dugay ni Gloria si Roger, gidawat niya ang gihalad nga gugma sa ulitawo.
Ang pagtan-aw sa amateur hour sa DYLA nga diha gihimo sa kanhi Philippine Tourism Authority (PTA) stage maoy usa sa ilang kalingawan.
Paborito nila nga tan-awon matag Domingo sa gabii kadtong indigay sa awit sa plaza nga gidumala kaniadto ni Rene Borromeo, announcer sa DYLA. (Sumpayan pa)