Gula 5
Nagkabuang pagdali-dali og ilis sa ilang saput sila si Glenn ug Wenna apan bisan pa niini naabtan g’yud sila sa mga tanod nga nagpatrolya sa maong lugar.
Gidakop sila sa mga tanod kay naaktohan man g’yud nga wala pa sila makasul-ob sa ilang mga karsones.
Unya, halos matunaw sa kauwaw si Wenna kay ang usa sa mga tanod nga nakasakop kanila iyang uyoan. Mao kini ang nangusog nga dakpon sila si Glenn ug dad-on sa mga ginikanan ni Wenna.
“Pastilan, maminyo g’yud ta’g ahat ani Glenn,” hagawhaw ni Wenna sa iyang kalit lang nahimong hinigugma.
“Wala na ta’y mahimo atubangon nato ang kaakohan sa usa ka batan-ong magtiayon,” dali nga tubag ni Glenn kang Wenna.
Didto sa balay ni Wenna, giawhag sa mga ginikanan sa dalaga si Glenn nga kuhaon ang iyang mga ginikanan aron masabotan ang ilang kasal.
“Tubaga ang imong kaakuhan sa among anak Glenn para dili mauwawan ang among bansagon,” bugnaw nga pamahayag sa inahan ni Wenna.
Tuod man, gikasabotan ang dinali-dali nga kasal nilang Wenna ug Glenn. Pareho sila nga wala pa makabaton og hinigugma.
Sa adlaw sa ilang kasal, daw bakikaw kaayo ang panglihok-lihok nila ni Wenna ug Glenn tungod kay nahuna-huna nila nga mga batan-on pa kaayo sila nga nahasum-ok sa kaminyoon.
“Puslan man nga naingon kita niini Wen, magsinaaray kita nga magminahalay hangtud sa kahangtoran ug nga unta, we hope nga first love never dies,” matud ni Glenn nga mipig-it sa kamot sa iyang asawa.
Nianang pagka hapon, may nahuna-hunaan si Glenn. “Wen tana, uban nako manglakaw ta.”
“Asa man ta Glenn?” daw natingala si Wenna kun asa siya dad-a sa iyang bana. Mitungas sila sa bukid hangtud nga miabut sila sa dapit nga nahimutangan sa balay’ng karaan.
“Manaka ta Wen. Anhi nako subli nga dimdimon ang imong dugam-is sa unang adlaw sa atong kasal,” matud ni Glenn. Mitig-ik siya sa kasakit dihang giluknit ni Wenna ang iyang kilid.
Gibukhad ni Glenn kadtong banig nga gihigdaan nila ug sa uban nilang mga barkada gikan nga nag-disco.
Nanghigda sila. Nahanduraw ni Wenna kadtong higayon nga nabantayan niya nga dunay mihikap sa iyang kalawasan.
“Abi nimo Glenn, pagkabantay nako nga gihikap nimo ang akong kalawasan wala na lang ko molihok kay mauwaw ko. Hangtud nga daw giganoy ko sa tumang kalalim,” matud ni Wenna.
Nag-ukobay dayon ang ilang mga ngabil ug misunod ang grabeng kahilom ug ang hangos ra ang madungog sa karaang balay nga ilang gisudlan. (Kataposan)