Gula 36
Mibuhi ang hepe og usa ka halawom nga panghupaw. Unya namulong kini: “Ambot kun motuo ka ba kaha, Carlo.”
“Sa unsa?” gitutokan ni Carlo ang hepe.
“Ang pagdagsang sa krimen timaan kuno sa pag-uswag sa usa ka dapit.”
“Mao bitaw kanay teyoriya sa mga eksperto. Tingali tinuod sab kay monunot man gayod ang kriminalidad kun magkaanam og kadaghan ang mga tawo ug mouswag na ang usa ka dapit. Apan daotan kana nga timailhan tungod kay ang pagdagsang sa krimen mao man usay makahulga sa seguridad sa mga lumolupyo sa usa ka dapit.”
Igo lang miyangoyango ang hepe sa iyang gisulti. Wala siya masayod kun mikalawat ba kini sa gipadayag niyang mga panahom.
Nialibwag, daw putyokan nga natugaw ang mga tawo dihang gibaswat na sa duha ka polis ang patay’ng lawas sa bata nga gipatong sa stretcher. Misunod sila sa mga tinugyanan sa balaod nga nagdayong sa minatay paingon didto sa ibabaw sa sapa. Si Lt. Valera miduol sa nahimutangan nila ni Maj. Dick Campo ug Carlo Guieb.
“Nahipos na nako ang tanan nga angay kuhaon, Sir,” taho sa tenyente. “Gidala na nila ni Monternel ug Maloloy-on ang minatay.”
“Good,” komplimento sa hepe. “Tuod diay, Tenyente, si Carlo Guieb, akong bag-ong higala.”
“Nakaila na ko niya, Sir,” ni Valera pa.
“Nagkaila mi niadtong akong pagduaw sa inyong buhatan, Dick,” mipasabot si Carlo. “Siya’y akong napangutan-an kun asa ko ikaw makita.”
“M-mao ba?” ingon sa nahilaw ang hepe.
“Naluoy ko sa bata, Sir,” gikan ni Valera. “Gipataop gyud ang baraw sa iyang dughan. Duna ra ba koy namatikdan nga nakapatingala nako.”
“Unsa man, Tenyente?” sa hepe. -- Sumpayan pa