Little black book

Gipadayag dayon nako ngadto kang Anita ang akong gibati kaniya. Hinan-ay ang akong mga pulong nga gipadayag sa iyang atubangan.

“Paspasa nimo, Jose, uy,” giingnan ko ni Anita.

“U-unsay paspas?” Nakapangutana ko.

“Tulin ka pa man sa manatad.”

“Unsay buot mong ipasabot nianang pagkasultiha?”

“Bag-o pa gani tang nagkaila unya nanguyab ka na dayon nako.” “Unsa man goy naa niana? Tinuod nga naa pa ta sa stage nga getting to know each other. Pero mas mailhan ko nimo kun magkarelasyon ta.”

“Hatagi una ko’g igong panahon sa pagtimbangtimbang sa imong proposal. Di ko gustong magdali-dali sa akong hukom.”

“Andam kong magpaabot, Anita. Panghinaoton ko lang nga nakapakanaog ka’g hukom sa labing daling panahon ug dili ko nimo pakyason.”

Gilugwayan ko ang akong pailob. Gipalabay ko ang kapin sa usa ka semana. Sa maong gidugayon, nagtuo kong makadesisyon na si Anita mahitungod sa gugmang akong gihalad kaniya.

Dihang napupos na ang tagal sa akong pailob alang kang Anita, nangita ko’g higayon nga magkasulti mi. Usa ka gabii niana, giatangan ko siya nga mogawas sa eskuylahan human sa kataposan niyang klase. Ug tuod man, nagkasulti gayod kami. Ako dayon siyang gisukna.

“Gisugot ta na ka, Jose,” nagkanayon si Anita.

“T-tinuod ka, An?” Nakasukna ko kay ingon sa dili ko makatuo.

“Wa ko magkomedya. Ug hinaot nga ampingan mo ang atong gugma.”

“Makalaom ka, An. Paninguhaon kong mahimong honest sa atong relasyon. Promise...”

Unya, nagplano dayon ko kun unsaon pag-angkon ang pagka babaye ni Anita. -- Sumpayan pa