Little black book

Gula 54

Paglabay sa usa ka semana, nakadawat ko’g sulat gikan ni Gelia agi’g tubag sa sulat nga akong gipadala kaniya. Sa iyang sulat, gipadayag sa akong girlfriend ang kamingaw nga iyang gibati sa among panaglagyo.

Gibaslan sab dayon nako ang sulat ni Gelia. Gisakay-sakayan lang nako ang mga pulong nga iyang gigaray sa iyang sulat kanako.

Pagkasunod adlaw, nadawat sab nako ang sulat gikan ni Jovie. Flattered kaayo kong nagbasa sa iyang sulat. Gimingaw na kuno siya pag-ayo nako ug na-miss niya ang among escapades together.

Gibaslan sab nako ang sulat ni Jovie. Gibulada ko siya’g maayo sa akong sulat alang niya. Gipatuo nga siya ray babaye sa akong kinabuhi.

Miabot ang tingklase. Mitungha na ko sa night high school. Busy na ako kanunay. Hectic na ang akong schedule. Kay gawas sa akong pagtuon, moabag pa man ko ni Nanay Piya sa pagpanindag puto ug sikwate sa merkado sa Carbon. Luoy man sab si Nanay kun walay makaayuda niya.

Nagpadayon ang pagsinulatay namo ni Gelia. Mao sab ang pagbinayloay og loveletter namo ni Jovie. Pero sa kadugayan, wala ko na basli ang ilang mga sulat nako. Giabot na ko’g katapol sa pagtubag sa mga sulat nga ilang gipadala kanako. Wala na ako ganahing mosulat ngadto nila. Labina dihang gikaila nako si Anita.

Matahom si Anita. Kun kalitan siya’g tan-aw, susama siya’g panagway ni Hayden Panettiere. Nagtungha usab siya sa night high school nga akong gi-eskuylahan apan dili mi classmate. Ahead siya nako’g usa ka tuig. Fourth year high school na siya samtang ako third year pa lang.

Naibog ko pag-ayo ni Anita. Gikasulat ko na man gani ang iyang ngalan sa talaan sa mga babaye nga akong naibgan-- sa akong little black book. Nangita ko’g higayon nga makapanguyab niya. Hangtod nga nagkaatol mi sa school canteen ug nakahigayon ko pagtuman sa akong plano. -- Sumpayan pa