Little black book

Gula 53

Pagkasunod adlaw, nahinayon ang pagbiya namo ni Tatay Merto ug Mama Piya sa lungsod sa Santander aron manimpalad sa dakbayan sa Sugbo. Didto kami mosangko sa sitio Sto. Niño, sakop sa barangay Quiot. Didto mi moabot sa pagsaka sa balay sa akong uyoan (igsuon ni Tatay) nga nanginabuhi pinaagi sa pagpangluto og bukhayo uban sa iyang pamilya.

Nagpatabang si Tatay ni Tiyo Roman sa pagpangitag balay nga among kapuy-an, kanang dili kaayo mahal ang abangan. Sanglit suheto na man si Tiyo Roman sa maong dapit, kadali ra siyang nakakita’g balay nga among kapuy-an. Ug niana dayong adlawa, mipahimutang mi sa maong balay nga gipanag-iya sa usa ka Aquilina Cabaluna.

Ingon sa kalit lang nausab ang dagan sa akong kinabuhi sa among pagbalhin og puyo sa siyudad. Daghan kaayong nindot nga mga talan-awon sa siyudad nga makalingaw ug makawagtang sa kamingaw. Wala kaayo ko dutli sa kamingaw sa duha nako ka hinigugma nga nahibilin didto sa Santander tungod kay nalingaw ko sa nagkadaiyang mga butang nga akong nakita sa siyudad. Para nako, mas nindot puy-an ang siyudad kay sa banika.

Misugod dayon ang akong mga ginikanan sa nahunahunaan nilang panginabuhi sa siyudad. Si Tatay Merto nagkonduktor sa usa ka mini bus nga magbiyahean sa south. Si Nanay Piya sab nanindag puto ug sikwate sa Carbon. Akoy iyang kaabag sa maong bulohaton.

Dihang hapit na ang tingklase, nagpa-enroll ko sa usa ka night high school. Gituyo ko nga sa night class motungha aron makaabag gihapon ko ni Nanay Piya sa pagpanindag puto ug sikwate sa Carbon gikan sa kaadlawon hangtod sa sayong kahaponon.

Human nakapa-enroll, mao pay akong pagkahinumdom nila ni Gelia ug Jovie. Nagpadala ko’g sulat alang nilang duha. Sa sulat, gisugilon ko kanila ang akong kahimtang sa dakbayan sa Sugbo. -- Sumpayan pa