Little black book

Gula 51

Bug-at ang hinungdan sa kalit nga desisyon sa akong mga ginikanan nga adto na kami manimuyo sa dakbayan sa Sugbo.

Mao ray among gisaligan sa panginabuhi ang pagpanguma. Apan dili na kasaligan ang panguma sa banika gumikan sa kakulang sa ulan.

Gawas pa, wala kami kaugalingong yuta. Nanaop lang ang akong mga ginikanan sa yuta sa tubig-tubigang pamilya sa among dapit.

Ug niining bag-o lang, gipasidan-an na ang akong mga ginikanan sa tag-iya sa yuta nga among gitikad nga bawion na nila ang maong luna kay ila kining tukoran og piggery.

Kini ang lintunganay’ng mga hinungdan nganong mihukom ang akong mga ginikanan nga molalin kami pagpuyo ngadto sa siyudad.

Dihang gitakda na ang among pagbiya paingon sa siyudad, nangita ko’g paagi nga magkasulti kami si Gelia. Gusto kong manamilit niya.

“Magkalagyo na diay ta,” nagkanayon si Gelia human ko siya kasultihi sa hukom sa akong mga ginikanan.

“Mao lagi,” nako pa. “Di man sab mahimong magpabilin ko dinhi.”

“Unya, unsaon na man lang ang atong relasyon?”

“Magsinuwatay lang ta.”

“Ayaw baya pangita’g lain didto sa siyudad, ha.”

“Di lagi. Ikaw ray akong mahalon. Ug ikaw sad dinhi... ayaw sab panguyab og lain.”

“Ikaw ra say akong mahalon ug higugmaon. Gikatugyan ko na kanimo ang akong pagka babaye busa di na ko mangita pa’g laing lalaki.”

Ug kay kami ra mang duha sa ilang balay niadtong higayona, gipahimuslan namo ang higayon. Sulod sa kuwarto ni Gelia, gitagbaw namo ang among kaugalingon pagtagay sa lawasnong kalipay. -- Sumpayan pa