Anino sa kulto

GULA 31

Nakapanglingo si Carlo. Misantop sa iyang hunahuna nga lisod pa gihapong ilhon ang maong tawo sanglit wala may nasayod sa tinuod nga ngalan niini. Nagpabiling tanghaga ang maong tawo alang kaniya. Unsa kahay hinungdan nga migamit man kini’g daghang mga alyas?

Mipadayon na usab si Carlo pagpakli sa mga papel sa folder. Giganid gayod niya’g suling ang tanang nahisulat sa papel. Gibasa niya ang minugbo ug tinag-as nga mga detalye. Unya, diha na usay nakasangit sa iyang pagtagad. Iya kining gisubli pagbasa. Nakapanglingo siya pagkahuman.

Nakaalagad diay ang misteryoso niyang kaaway sa kuwerpo sa kapolisan sa Mansaya, Mindoro Oriental ginamit ang ngalan nga Ramon Diaz. Apan natangtang kini sa trabaho gumikan sa kaabusado. Ulahi nang nasuta nga ang Ramon Diaz usa lang ka alyas. Sa ubang mga transaksiyon sa maong tawo, migamit kini sa ngalan nga Luis Navarro, Miguel Valdez, Sancho Ramirez ug Dante Gatmaitan. Busa wala masayod ang mga kapolisan kun hain niining lima ang tinuod nga ngalan sa maong tawo o mga alyas ba niya ang tanan.

Wala tuyoa, nadapuwas ni Carlo ang iyang nawong sa tuo niyang palad. Unya gitukod niya ang iyang siko sa lamesita ug gipat-ol ang iyang suwang sa iyang palad. Naghinuktok siya sa maong kahimtang. Naglibog na hinuon siya karon niining nagkalahugay’ng kasayoran nga miabot kaniya. Unsa ug si kinsa ba gayod diay kining tawong misteryoso nga giisip niyang kaaway nga ingon sa nagkalawom man ang misteryoso nga iyang nakuykoy bahin sa pagkatawo niini?

Nanglabay ang mga adlaw. Natapos ang pangadye alang sa mga kalag sa mga ginikanan ni Carlo. Apan nagpabilin pang gawasnon ang mga tawo nga maoy responsable sa ilang kamatayon. Naglabad ang ulo ni Carlo sa gipahigayon niyang imbestigasyon bahin sa maong kaso. -- Sumpayan pa