Gula 50
Gawas sa gibati kong kakulba, mitingkag sab ang akong mga dalunggan dihang may namatikdan kong katingad-an paghimuntog nako sa tugkaran sa among balay. May nakita kong duha ka anino nga tulin nga mipalayo gikan sa dapit sa may kusina sa among balay.
Tulin kaayong mipalayo ang duha ka anino tadlas sa ilawom sa kalubihan ug kasagingan sa luyo sa among balay. Mga pipila lang ka gutling ang milabay ug wala ko na sila makita. Sa hilom nakapangutana ko sa akong kaugalingon kun kinsa man kaha kadtong mga tawo nga akong nakita?
Pagkaugma, natubag ang akong pangutana. Nagbagulbol si Tatay Merto sa buntag nga sayo. Nadiskobrehan man gud niya nga nawagtang na didto sa pugaran ang among himungaan nga naglumlom. Gisuginlan ko si Tatay nga kagabii may nakita kong mga anino nga nagdali pagpalayo sa balay sa akong pag-abot gikan sa sentro sa lungsod. Mga kawatan diay kadtong mga tawhana!
“Nganong nagpagabii ka man sab og pauli gikang naglaag, Jose?” Gipangutana ko ni Tatay Merto dihang namahaw na kami.
Wala ko motingog.
“Pastilan baya ka, Merto,” gikan ni Nanay Piya. “Wa ka pa ba diay makasabot sa lihok sa imong anak? Nga kun na-sunoy pa ni siya, dugay ra man ning naghangad-hangad sa pugaran?”
Wala gihapon ko motingog. Pero nakasabot ko sa pasumbingay ni Nanay.
Human sa pamahaw, misulod ko sa akong kuwarto. Gikuha nako ang akong little black book. Gitsekan nako ang ngalan ni Jovie, timaan nga naangkon ko na sa hingpit ang iyang pagka-babaye.
Miabot ang bulan sa Mayo. Excited ko kay usa na lang ka bulan ug mobukas na usab ang mga klase. Makita ko na usab ang mga babaye nga akong gikaibgan sa among eskuylahan. Apan nakugang ko’s gisulti ni Tatay Merto nga mamalhin na mi’g puyo sa dakbayan sa Sugbo.-- Sumpayan pa