Anino sa kulto

Gula 29

Milahos siya sa iyang lawak human sa daklit nga pagpakighinabi sa iyang iyaan ug ig-agaw. Human makailis, milingkod si Carlo sa ngilit sa kama. Wala tuyoa, napantok ang iyang panan-aw ngadto sa knapsack. Unya kalit may mitungha sa iyang hunahuna. Mitindog siya ug gidulong ang nahimutangan sa iyang bag. Iyang giabli ang siper niini. Gikuha ang folder nga gihatag ni Z kaniya. Sukad sa paghatag ni Z niini kaniya, wala pa kini niya mabasa.

Miduol si Carlo sa nahimutangan sa gamay’ng lamesita. Gibira niya ang silya ug milingkod. Gipatong niya sa ibabaw sa lamesita ang folder nga iyang gibitbit. Gisugdan dayon niya pagpakli ang mga papeles sa maong folder.

Lagsik ug madasigon siyang nangukay sa mga papeles nga nag-ungot sa paper fastener sa folder. Gitamdan niya’g tagsatagsa ang mga dokumento. Namasin siya nga makakuhag anggulo sa kasulbaran sa nahitabo sa iyang mga ginikanan gikan sa impormasyon nga nahipos ni Agent W-9, kauban niyang detektib sa Magic Alphabet section sa VIDA, bahin sa tawo nga iyang gikasangka didto sa Luneta nga mao usay iyang gidudahan nga maoy responsable sa pagpatay sa iyang mga ginikanan.

Unya, takulahaw lang, kalit nanagko ang mga mata ni Carlo sa iyang nabasahan sa usa ka mga dokumento nga gipalugpitan sa folder.

Naglisud pagtuo si Carlo Guieb. Wala siya magdahom niining kamatuoran nga iyang nasayran karon. Ang mga dokumento nga gihatag ni Z kaniya nagbutyag nga ang misteryosong kaaway nga iyang gika-engkwentro didto sa Luneta ug mao usay iyang gidudahan nga nagpatay o nagpapatay sa iyang mga ginikanan usa diay ka sakop sa internasyonal nga kulto. Nakapanglingo si Carlo sa maong kasayoran. -- Sumpayan pa