Anino sa kulto

Gula 27

“Bitaw, Dick,” ug miigham siya aron paghawan sa iyang tutunlan. “Gusto kong masayod bahin sa resulta sa inyong imbestigasyon sa kamatayon sa akong mga ginikanan. May nakuha na ba kamong lead bahin sa maong kaso?”

Nakita ni Carlo nga milugdong ang nawong sa hepe. Unya miluwat kini’g usa ka panghupaw nga nagkugos og kahisagmuyo.

“Sorry kaayo, Carlo,” naluya ang tingog sa hepe. “Hangtod karon blangko pa kami bahin sa maong kaso. Wala gani maingon nga trace ug clue. Hanap gyud ang tanan. Bisan sa inyong mga silingan walay nangahas sa pagtestigo. Ambot kun nahadlok ba kaha o unsa. Basta mao ra gyu’y ilang gisulti nga wala sila makasaksi sa nahitabo. Aw, diha diay untay usa, si Ben Cadigal, pero dili sab magamit ang iyang pamahayag.”

“Unsa man diay iyang pamahayag, Dick?” Sukit ni Carlo.

“Nakakita kuno siya sa awto nga gisakyan sa mga tawo nga nagrapido sa inyong balay. Apan wala niya makita ang mga sakay niini kay wala man sila manganaog dihang ilang girakrakan ang inyong balay nga maoy nakakalas sa kinabuhi sa imong mga ginikanan. Itom kuno ang color sa awto apan walay plate number.”

Nakapanghupaw si Carlo sa iyang nadungog. Ingon sa nasugmoy siya. Mora’g dili kalauman ang nahagdaw nga kasayoran sa hepe. Lisod ang pag-trace kun kinsay tag-iya niadtong itom nga awto nga gisakyan sa mga mamumuno.

“Naghimo na kami’g pakisusi bahin sa giingong itom nga awto,” matud na usab sa hepe. “Pero walay nanag-iya’g itom nga awto dinhi sa lungsod sa Mabini. Sa silingang mga lungsod, duna hinuon. Pero mora’g imposible na man usab tingali kun taga laing lugar ang mga mamumuno. Aw, hinuon...in some cases, may posibilidad kana. Pero sa kaso sa imong mga ginikanan, mora’g dili katuohan nga taga laing lugar ang naghimo sa ingon. Wala tulisa ang imong mga ginikanan. Gipatay lang sila. So, unsay motibo sa mga kriminal, granting nga taga laing lugar sila?” -- Sumpayan pa