Nagubot ang mga lumolupyo sa lungsod sa Sibundoy. Labi na ang mga doctor. Kay daw dunay epidemic ang maong lungsod. Ang mga doctor ray biktima. Sulod lang sa usa ka bulan, napulo na ka doctor ang nangamatay. Dili sa sakit. Kun dili, biktima sila sa ilang mga pasyente.
Nag-hire na’g mga bodyguards ang mga doctor nga wa pa nahitabo-i. Testigos ang mga sekretarya sa mga doctor nga nabiktima, nga mga pasyente ra mismo sa mga doctor ang nibuhat sa salaod.
Sa tibook probinsiya sa Sugbo ang lungsod sa Sibundoy maoy dunay pinakadaghang doctor. May sobra singkwenta. Naa sab sa maong lungsod ang pinakadaghang mga botika ug mga laboratory o paktori sa mga tambal. Namatud-an sa mga pakisusi sa mga kapolisan ug mga reporters nga may kalambigitan ang mga salaod sa cough syrup nga ginganlan og SELVON. Ang maong tambal gimugna sa GREEN MEADOW PHARMACEUTICALS. Ug kasamtangang giimbistiga ang maong paktori sa tambal. Kay ang gipamatay nga mga doctor nerisita sa ilang pasyente anang tambal sa ubo nga ginganlan og Selvon.
Sumala sa imbestigasyon sa kapulisan nga gipangulohan ni SPO4 Rel Becalas, ang ikanapulong doctor nga namatay nga si Dr. Byron Espino niresita sa iyang pasyente og cough syrup. Si Roy Zapanta ang maong pasyente. Suspek siya sa pagpitlok sa doctor mismo atubangan sa iyang sekretarya nga si Mary Grace Bacus. Sa pagtumar makadaghan ni Roy sa Selvon, wa naayo iyang ubo. Hinoon, nisamot kini. Gipahimungtan kuno niya ang doctor. Maong gipatay niya kini.
Daghang nagbanabana nga ang maong cough syrup makadaut sa pangutok sa pasyente nga motomar niini.
Giimbistigahan sab sa kapolisan ang paktori sa tambal. Nanghimakak ang tag-iya nga si Dr. Alex Tudtud. Niya pa, dili makadaut sa utok ang tambal nga mugna sa ilang laboratory. Naghimo sab siya’g iyang kaugalingong imbestigasyon. Nasayran niya nga dili sa sambog o ingredient sa tambal ang may depekto. Kun dili ang tatak lang sa label nga gipapilit sa botelya. Duna lay gamay nga clerical error.
Nasuta na sa management investigators sa kompanya sa tambal nga gipangulohan ni Dr. Edward Cuenca kun kinsa ang responsable sa clerical error. Way lain kun di ilang computer programmer nga si Ritchie Tibon. Kusog kaayong mosuyop si Ritche sa ilang produkto nga cough syrup. Bisag wa siya’y ubo. Unya bisag nagtrabaho siya’s computer aron pagbutang og label sa mga produkto, sabog siya sa cough syrup. Maong nagkasinayop iyang trabaho. Wa magkadimao iyang mga tatak, litra o pulong nga nabutang sa ilang mga tambal. Labi na sa cough syrup nga Selvon.
Gipangita na karon si Ritche sa balaod. Kay pagkasayod niyang siya ang gibasol sa management sa ilang kompanya sa mga trahedyang nahitabo, wa na siya ni-report sa trabaho. Nagtagotago na karon si Ritche.
Nangayog pasaylo ang tag-iya sa paktori sa tambal sa publiko. Ilabi na ngadto's mga pamilya sa mga doctor nga nangamatay. Nitabang sila’g gasto aron madakpan ang mga suspek nga mga pasyente. Kay dako ang purohan nga sila mismo ang nipatay sa mga doctor nga niresita sa mga tambal nga ilang gitomar. Nagtagotago na sab ang mga pasyente nga mga suspek.
Nihimo’g maayong lakang ang management sa paktori sa tambal. Ilang gipauli ang tanang mga cough syrup nga Selvon gikan sa tanang mga botika ug tanang ubang outlet. Ilang gipalit og balik ang maong brand sa cough syrup. Kay ilang sapawan ang mga label nga gipapilit sa mga botelya nga dunay clerical error. Ilang tabunan sa insaktong mga pulong ang label nga nag-ingon: "IF SYMPTOMS PERSIST, KILL YOUR DOCTOR". Gikasubo kaayo sa management ang maong sayop. (Katapusan)