Anino sa kulto

Gula 21

Human sa pangaon, wala pay usa kanila nga mibaro’g gikan sa ilang gilingkoran. Dinhi mibuak si Tiyo Berto sa kahilom.

“Unsay imong plano karon, Dong Carlo, mahitungod sa patay’ng lawas sa imong mga ginikanan?”

Wala motingog si Carlo. Miipis siya’g bugnaw’ng tubig gikan sa pitcher ngadto sa iyang baso ug miinom. Giyarok niya ang tubig sa sulod sa baso ug wala na kini sulod nga iyang gibutang sa lamesa.

“Wala ka pa bay plano, Dong,” gikan ni Tiya Marta ang pangutana, “Kun kanus-a ilubong sila si Manong Paulo ug Manang Rita.”

Miipis na usab og tubig si Carlo sa iyang baso. Ug miinom. Human matilok ang sulod sa baso, namulong: “Ipalubong na nato sila, Tiya, sa Domingo.”

“Ikaw ang mag-igo, Dong,” matud sa iyang iyaan. “Andam kami kanunay sa pag-abag nimo.”

“Daghang salamat kaninyo, Tiya,” niya pa. “Kun wala pa tingali kamo, ambot kun unsa nay nahitabo kanako karon. Ambot kun kinsay mohipos sa patay’ng lawas nila ni Papa ug Mama.”

“Gikasubo namo pag-ayo ang nahitabo, Dong,” misagbat si Tiyo Berto. “Sa sinugdan wala kami makadawat sa ilang gidangatan.”

“Unsay resulta sa gihimong imbestigasyon sa kapolisan mahitungod niining hitaboa, Tiyo?” usisa ni Carlo.

“Mora’g wa pa gyud sila’y nakuhang lead,” laktod nga tubag ni Berto. “Limpiyo kaayong pagkahimo ang krimen.”

“Siyaro na man sab kun wala gayoy mga silingan nga nakasaksi sa maong hitabo,” ni Carlo nga daw may kahimangod ang balatian.

“Wala gyud, Dong,” salo ni Tiya Marta. “Kaadlawon kadto nahitabo ug ang tanan nakalitan. Kinsay magdahom nga mahitabo kadto? Sukad masukad, natiguwang na lang ko ning dapita, karon pa man gyud mahitabo nga may gipatay sa wala hiilhing mga mamumuno.” -- Sumpayan pa