Mamatay ra gyud gihapon

Kay lawom naman kaayo ang kagabhion, nakahukom na lang ang mga bangkero sa paghunong sa ilang duwang hantak. Gipanghipos dayon nila ang ilang mga lamesa, lakip na ang bato ug mga antugon.

Ug kay diha pa may pipila ka mga sugarol nga nahabilin, ug nagpadayon pa sab ang disco, nakahukom ang managhigalang si Osting ug Boning nga sila na lay magpahantak. Ug dili na lang ipaagi og bangka. Idemano na lang. Nga bato na lang ug mga antugon, maoy gamiton. Ug igo na lang silang magpakalas.

Agig pagsugod nag-unay-unay lang una sila si Osting ug Boning. Si Osting maoy nag-antog ug si Boning maoy mipusta sa patay. Hangtod nga nag-anam sa pagdugok ang mga sugarol. Ug nag-alirong sila sa bato, nga diha ipahimutang sa yuta.

Usa sa mga midugok niadtong tungora, mao ang usa ka hamtong nga lalake, nga may gikakuyog nga usa ka batang lalake. Ug namusta usab kini. Diha mopusta ang maong hamtong nga lalake sa patay. Dagko gani kaayo kinig pinustahan.

Tungod kay mihasi naman kaayo ang pinustahay, mikihat dayon si Boning ngadto sa iyang higalang si Osting. Nga morag dunay buot ipasabot. Mao ray nagsultihanay ang ilang mga mata. Ug sila ra usab maoy nakasabot niini.

Tungod sa kahanas na niini, dali ra kaayong nakambiyuhan ni Osting ang usa sa mga antugon, nga wala gyuy laing nakamatikod, gawas lang sa iyang batos nga si Boning. Nga mikalit lang og bali og pusta, ngadto sa hari. Labon sa sinugdanan, didto man unta kini mopusta sa patay. Ug siya na gani hinuon maoy modawat sa ipusta sa hamtong nga lalake, nga kanunay gyud nga nagpapatay.

Hasta kapila moayri og antog si Osting, ug kanunay gayud kining mahari. Ug kay nag-apas lagi kaha nga mamatay na gayud ang mga antugon nga giantog ni Osting, ang hamtong nga lalake kanunay usab nga nagpapatay. Hangtod nga napilde na gayud kinig dako kaayong kantidad sa kuwarta. Gipaningot na gani kini og maayo.

Sa nadugay na og inantugay ni Osting ug wala gihapon kini mamatay, kalit lang nga nangablit ang batang lalake ngadto sa iyang amahan. Maong nakalingi ang amahan ngadto sa iyang anak, aron sa pagsusi kun unsay tuyo niini.

"Tay, hunong na og pusta. Kay dunay lahatab kanang usa ka antugon. Dili gayud na mamatay," nagkanayon ang batang lalake, nga taudtaod na diay nga naniid sa mga lihok ni Osting.

"Ayaw lang og kabalaka Dong. Kay mamatay ra lagi na. Apil pa ang nag-antog," kalma kaayo nga mitubag ang hamtong lalake, nga morag may gikuot diha sa iyang may hawakan.

Kalit lang nagkatibulaag ang mga nanagpundok nga mga sugarol, nga nanghantak, sa dihang mikalit lang sa pagkaratil og dagan si Osting, biniyaan ang tulo ka mga antugon, nga nagsigi lang gihapon og tuyok diha sa ibabaw sa batong may giantugan.

Midagan diay kini tungod sa kalisang, kay miibot naman ang hamtong nga lalake og kutsilyo aron unta siya dunggabon, samtang nag-antog. (Kataposan)