Anino sa Kulto

“Maayo hinuon, Sir,” ni Carlo pa.

“Dako ang akong pagtuo nga ang maong tawo maoy nagpatay ni Agent W-12,” matud ni Z. “Nagtinguha siya sa kinabuhi natong tanan. Kun unsay iyang tumong, kana maoy lubog pa sa pagkakaron. Busa dakpa siya, Double-U-Seven.”

“Paninguhaon ko, Sir,” ni Carlo,” nga masikop siya sa labing daling panahon.”

Gibira ni Z ang hunos sa atubangan niini ug may gikuha. Pagkahulbot sa kamot niini, nakita ni Carlo ang usa ka Nokia cellphone nga 8810. Gitunol kini ni Z kaniya.

“Gamita kini,” ni Z. “Kinahanglang makakontak ka dinhi aron ma-monitor namo ang imong mga lakaw.”

“Salamat, Sir,” ni Carlo nga midawat sa cellphone.

“Magamit mo usab kana panahon sa emerhinsiya,” pasabot ni Z.“I-set lang ang ring tone sa type 13 aron mahimo kanang cellgun. Tulpoka ang asterisk-zero-zero-seven ug dayon ang send button aron mobuto kini. Lima ka bala ang sulod niana.”

Wala madugay, nanamilit na si Carlo Guieb kang Z.

Ang ayroplano migikan sa Ninoy Aquino International Airport nianang alas 11:15 sa buntag. Midangat kini sa tugpahanan sa dakbayan sa Tagbilaran lapas na alas dose sa kaudtohon. Si Carlo Guieb midali pagkanaog nunot sa naglumbay nga mga pasahero ug migawas sa arrival area. Mikuha siya’g taksi ug nagpahatod ngadto sa bus terminal. Tayming usab sa iyang pag-abot sa terminal nga dihay bus nga lumargahay paingon sa Mabini. Misakay dayon siya. Igo lang siyang nakapahimutang, milarga na ang bus.

Milungtad og tulo ka oras ang pagbiyahe sa bus una kini nahidangat sa lungsod sa Mabini. Milusad si Carlo Guieb tungod sa merkado ug nagpahatod og traysikol ngadto sa Cadigal St. Mihunong ang traysikol tungod sa ilang pinuy-anan. Nanaog siya human hatagi ang driver sa plite. -- Sumpayan pa