Anino sa kulto

Gula 16

“Mangayo ko’g emergency leave, Sir,” tul-id nga padayag ni Carlo sa iyang tuyo. “May nahitabo sa akong mga ginikanan. Kinahanglang mopauli ko sa Bohol karon gyung adlawa.”

Gipasabot ni Carlo si Z sa nahitabo. Gisaysay niya nga human sa panagsulti nila ni Z kaganinang sayo sa buntag, mibanos usab pagpanawag ang misteryoso niyang kaaway ug kini mitug-an nga atua kini sa Bohol. Wala madugay tapos niya gikasulti ang kaaway, nanawag usab kaniya ang iyang ig-agaw nga si Belen, nagpahibalo kaniya nga gipatay ang iyang mga ginikanan. Igo lang nakapanglingo si Z human kasuginli ni Carlo sa tanan.

“Kun mao kana,” ni Z pa. “Posible nga kadtong tawo nga imong gikaengkuwentro sa Luneta atua gayod sa Bohol ug maoy responsable sa nahitabo sa imong mga ginikanan.”

“Mao kanay gusto nakong sutaon, Sir,” matud ni Carlo Guieb.

“Buyno,” matud ni Z. “Hatagan ko ikaw og emergency leave segun sa imong gipangayo. Idugtong na lang nato kini sa gigamit mong sick leave karon. Ug condolence diay...”

“Daghang salamat Sir,” nagkanayon si Carlo.

Mitindog si Z ug gidulong ang nahimutangan sa steel cabinet sa usa ka suok sulod sa lawak-buhatan. Gibira niini ang tunga-tungang drawer. Gikuha ang usa ka folder ug mibalik sa gilingkoran niining swivel chair.

“Samtang atua ka sa Bohol,” ni Z pa. “Padayon ang pagtuman sa misyon nga gisangon ko kanimo kay atua man kaha didto ang misteryusong tawo nga imong gikasangka sa Luneta.”

“Yes, Sir,” sanong ni Carlo.

“Nia ang mga impormasyon nga nakuha ni Agent W-9 bahin sa tawo nga imong gikaengkwentro,” gitunol ni Z ang folder ngadto ni Carlo. “Gipalihok ko ang atong kauban samtang didto ka sa ospital ug mao kana ang iyang nahagdaw.” -- Sumpayan pa