A better man

Domingo. Alas sayis sa hapon. Way maayong buot si Ritche paghiuli sa ilang balay. Nisulod siya’s ilang sala nga nagbagutbot. Naabtan niya si Marivel iyang kapikas nga naglingkod sa sopa.

Naminaw og awit ni Engelgert Humperdinck, iyang paboritong singer. Bag-o lang nahuman ang Love Me With All Your Heart. Unya nagsugod ang laing awit. Nagkanayon "If I could catch a star before it touch the ground...".

"Nganong sayo man kang niuli? Dapat mag-enjoy ka kay mao roy imong day-off sa pa’g-inatiman sa atong panimalay" malumong pulong ni Marivel. "Wa ko ganahi sa pundok-pundok sa mga bana sa atong subdivision karon. Ang gihisgutan mga banang way trabaho nga maoy nahibilin sa balay. Igo kaayo ko ug mora’g ako ra say gitumong," ni Ritche Malagoton. Nakapanghupaw si Marivel.

Igo lang nakahuman og hayskol si Ritche. Bugtong siyang anak apan wa kapanunod sa dakong luna nga kamaisan ug kalubihan sa ilang baryo sa Kalangkang, Badian. Kay pagkasakit sa iyang Tatay Fernando, gibaligya nila sa iyang Nanay Narda aron may ikabayad sa doctor sa ospital ug mga tambal. Apan wa magdugay iyang tatay kay cancer sa atay ang sakit. Tungod kay kusog moinom. Unya dangtag usa ka tuig, nakigtaban iyang nanay og batan-ong lalaki. Nahibilin si Ritche nga nag-inusara sa ilang payag. Nabuhi siya sa pagpasuhol sa pagpananggot.

Kaklase ug best friend niya si Marivel gikan sa elementary hangtud sa hayskul. Lima ka tuig na silang wa nagkita gikan sa paggradwar nila sa hayskul. Unya usa ka hapon, nikalit la’g butho si Marivel sa tugkaran sa payag ni Ritche.

"Kumusta na man ka oy?" ni Marivel nga mapahiyumon. Sidlak iyang mga mata nga nagsud-ong kang Ritche nga naglingkod sa tumoy sa hagdan nga may tulo lang ka ang-ang. Nagkutingkuting siya sa karaang gitara nga bagol.

Nagdala og pinutos nga regalo si Marivel. Ang sulod ukay-ukay nga T-shirt ug short pants. "Pasensiya ka na. Mao ra nay kaya nakong regalo nimo" ni Marivel. "Kanindot na ini ah. Ako gani way para nimo mamayabas sa ko’g dalidali. Daghan sang mga siniguylas," ni Ritche. Mao ray gihuwat ni Marivel nga isulti sa ulitawo. Malipay siyang hatagag mga prutas ni Ritche.

Dangtag usa ka bulan, naghilak si Marivel nga nisumbong ni Ritche. Nahagbong siya sa board exams pagka-CPA.

"Ay'g kaguol ana. Puwede pa mousab. Better luck next time. Just double your effort". "Di na ko gastohan ni Mama Rina ug Papa Wilben."

"Manarbaho ka na lang. Ang Accountancy graduate puwede mag-bookkeeper o accounting clerk. Daghag kapilian". Nadasig si Marivel.

"Kuyog ta mangaplay og trabaho. Mangaplay tang duha." "Unsa man kahay ikasulti’s imong ginikanan. Nga nakigkuyog ka’g manananggot?"

"Sakto na ko’s edad".

"Matay! Maulaw man kong makigkuyog og seksi ug guwapa". "Wa gyud ka kasabut? Kabugo sab nimo Ritche! Sukad sa first year high school pa ta ikaw na akong gihigugma!" ni Marivel sa malagutong tuno.

Nihilak.

"Mao sab ko. Apan managlahi atong kahimtang". "Wa nay apan apan. Ang gugma may paagi. Mobuntog sa tanang gomunhap."

Nagkasabot silang magpakasal kun may trabaho na si Marivel. Tulo ka tuig human sa kasal nakapasar na si Marivel sa board exams. Dangtag napulo ka tuig, duha na ilang anak. Nakapuyo na sila’g subdivision sa Talamban.

"Ayaw ipaubos imong pagtan-aw sa kaugalingon. Kay tungod sa akong gugma nimo, gipasegarbo tika". "Under de saya man gud kuno ko. Houseband. Dili husband". "Imong gihimo, trabaho sa babaye. Luto, laba, panglimpiyo’s balay, atiman sa mga bata. Dili na sayon trabahoa. Akong gihimo, trabaho sa lalaki kay akoy nangitag kuwarta sa atong panginahanglan. Dili sab sayon. Apan tungod sa atong gugma sa usa’g-usa, mao ni atong gikasabutan. Way laing tawo makapanghilabot sa atong gikasabutan. Pasuwaya imong barkada sa imong gihimo bisag usa lang ka adlaw. Lalim ba. Mao nga gihangad tika isip akong bana. Busa angay kang proud sa imong kaugalingon. Kay dili sayon imong papel sa atong kaminyoon". Nakapahiyom si Riche. Nigakos ni Marivel. Ug natuhop gyud sa kasingkasing nila ang mensahe sa kantang nagtukar.

"And as I am today. That's how I'll always stay. A better man for having loved you. A better man for having love you." (Katapusan)