GULA 15
Gibati niya ang iyang pagkasad-an sa nahitabo kanila. Iyang napalandong nga napatay ang iyang mga ginikanan nga wala gayod makahimo pagpanalipod sa ilang kaugalingon. Kun didto pa unta siya sa Bohol atol sa maong hitabo, iya untang napanalipdan ang iyang mga ginikanan batok sa tawo o mga tawo nga nagtinguha sa ilang kinabuhi. Mao nga karon mibati siya nga sad-an sa gidangatan sa iyang mga ginikanan.
Ang taksi nga iyang gisakyan dugay gayod nga nakalingkawas sa kahuot sa trapiko una pa kini makalahos sa buhatan sa VIDA. Mihunong kini sa atubangan gayod sa nagbuntaog nga bilding nga buhatan sa paniktik. Gibayran dayon ni Carlo ang sapyor sa kantidad nga giyamar sa metrohan ug unya nanaog siya. Midiritso siya’g sulod sa buhatan sa VIDA.
Wala matagad ni Carlo ang iyang mga kaubang detektib nga mitimbaya kaniya sa iyang pagsulod. Igo lang silang misunod pagtan-aw kaniya sa iya nang paghisaylo sa ilang nahimutangan. Daw sa wala gani siya sa iyang kaugalingon samtang nagsakay sa elevator paingon sa lawak-buhatan ni Z.
Daw nakugang si Z pagkakita niini kang Carlo Guieb nga nagbarog duol sa pultahan sa lawak buhatan niini. Nasabot ni Carlo nga wala kini magdahom nga mahitungha siya sa buhatan sa Vanguard Intelligence and Detective Agency karong buntaga. Gitutokan siya ni Z. Gisuhid niini ang katibuk-an niyang bayhon lakip na ang bag nga iyang gikalibay.
“Maayong pag-abot, Double-U-Seven,” mitimbaya kaniya si Z. “Lingkod.”
Mihinay paglingkod si Carlo. Gisabak niya ang bag sa duha niya ka paa. Si Z mihunong sa gikurikuri niini. Daklit nga gitutokan ang bandahe sa iyang nawong.
“Unsang hangina ang nagdala nimo nganhi?” Nangutana si Z kaniya. “Wala pa man koy order nga gihatag kanimo.”
“Nasayod ko Sir,” ni Carlo pa. “Apan nia ko alang sa laing katuyoan.”
Mitadlas ang pipila ka kunot sa agtang ni Z nga nahatan-aw kang Carlo Guieb nga seryoso kaayong namulong. Mapangutan-on ang tinan-awan niini kaniya. -- Sumpayan pa