Way konsensiya

Sir! Sir! Sir!” Nakugang ug nakalitan si SPO4 Rel Becalas hepe sa kapolisan sa lungsod sa Sibundoy sa iyang nadungog. Ning alas diyes sa buntag, namirma siya’g mga Police Report nga nagtipun-og sa iyang lamesa.

Unya kalit may batang lalaki nga nagdagan nga nisulod sa Police Office. “May batang babaye nga gipaligsan!” sa bata dihang niyahat ang hepe aron mangutana kun unsay nahitabo. “Ha! Diin man?’ sa hepe nga daw nituskig sa iyang gilingkuran. Nabuhian niya ang bolpen. Nipatong ang bolpen sa mga papel samtang ang hepe nitutok sa batang natumog sa singot ug naghingutas, nga nagbarog sa iyang atubangan. Ang tulo ka laing mga polis nga naglingkod sa ilang tagsatagsa ka mga lamesa, nahalingi sa bata. Ug nanindog sila.

“Didto sa likuong dalan sa baryo Kuyabo!” sa bata nga naggukod pa sa iyang gininhawa. Kapin sa usa ka kilometro gikan sa Poblasyon (diin nahimutang ang opisina sa pulis) ang gilay-on sa maong likuon nga karsada. “Lingkod una. Pahuway kadiyot. Ginhawa’g lawom. Unya inig kawala sa imong kutas, isugid kun unsay nahitabo,” sa hepe. Nipunsisok sila si SPO3 Jover Campus, SPO2 Alex Tudtud ug SPO1 Richard Dagoc tungod sa lamesa sa ilang hepe.

Nasayran sa hepe nga ang batang lalaki si Wilben Duhig, diyes anyos, estudyante sa grade four sa Kuyabo Elementary School. Wa siya nitungha kay nagkalibang. Nasugoan hinuon sa iyang Papa Allan nga manugway sa mga kanding nila sa bakilid ibabaw sa likuong dalan sa ilang baryo. Nag-umbaw ang maong bakilid sa likuong dalan. Samtang nanibsib ang lima ka kanding, gibati si Wilben og sugo sa lawas. Nipasalipod lang siya’s mga labong nga halaman.

Nitago siya pag-ayo dihang niagi si Mary Grace Bacus iyang kaklase nga naglakaw sa tuong habig sa karsada. Luya ang linaktan ni Mary Grace. Nahadlok si Wilben nga mahangaran sa iyang kaklase nga nitubag sa sugo sa lawas sa kalibonan. Nipasalipod gyud siya’g maayo.

Unya may bus nga kusug nga nagdagan. Green Meadow Tours nga bag-o lang nigawas gikan sa grahean. Wa pay pasahero. Disgrasya nga nasaghiran si Mary Grace sa bus. Nalabay sa daplin. Ug nawad-an og panimuot. Nihunong ang bus sa unahan. Niatras. “Dali! Kuhaa ang bata ug ibangil sa ligid! Maayo kay awaaw ning lugara. Way tawo!” mandar sa drayber ngadto sa iyang konduktor nga naglingkod duol sa pultahan sa bus. Nituman ang konduktor sa mando.

“Salbahis!” Nakapanglingo ug nanakla ang hepe. Nagpangusmo sa kalagot ang laing tulo ka mga polis. “Unsay plate number sa bus?” sa hepe. “ESQ 652” sa bata. Giradyohan dayon sa hepe ang police substation duol sa terminal sa mga bus. “Arestoha ang drayber ug konduktor! I-impound ang bus!” matud sa hepe dayong butang sa walkie-talkie.

“Mopirma ka’g statement sa imong gi-report?” sa hepe ngadtong Wilben. “O. Sir” ni Wilben bisa’g nagkurog pa sa kanerbiyos sa iyang nakita. “Campus,Tudtud ug Dagoc! Kuha ang gipang-arestar. Ibalhog sa prisohan dinhi’s presinto. Samtang akong preparahon ang statement ni Wilben. Ug pagkontak mo’g punerarya para sa lawas sa biktima” sa hepe. Nanggawas dayon sa opisina ang tulo ug nisakay sa patrol car.

Dihang nabaniog sa Kuyabo Elementary School ang nahitabo ni Mary Grace, may nakataho sa hepe nga gipapauli diay sa maestra ang bata kay gihilantan. Unya naabtan sa dimalas kay naagian sa drayber ug konduktor nga mga way konsensiya.

Sulod sa bilanggoan gihatagan dayon sa hepe ang duha ka piniriso sa kopya sa Complaint batok nila. “Nganong murder man among kaso, Chief? Nga ang makaligis homicide thru reckless imprudence ra may kasagarang kaso?” matud sa drayber nga si Ritche Tibon. “Adto lang unya mo pangutana sa inyong abogado. Apan kun gusto gyud ka’s akong tubag, hinaut lang nga nasayop ko. Dunay ebidensiya nga gituyo gyud ninyo’g paligis ang bata. sumala sa Artikulo 248 sa Revised Penal Code, ang tinuyo nga pagpatay ginamit ang sakyanang demakina, murder ang krimen. Dili homicide” sa hepe. Nipakli siya’g libro sa balaod ibabaw sa iyang lamesa. Nanagminghoy ang duha. Ang konduktor nga si Roy Zapanta nagsige’g pasiklap sa iyang kauban nga may tinan-awan sa pagbasol. (Katapusan) (Ang magbabasa nga gusto’g libre nga konsulta, dad-a ning pahina sa opisina sa tagsulat. Iatol og Sabado)