Little black book

Gula 34

Gibulagan ko ni Crisanta. Nahiubos kuno siya’g maayo nga nakigrelasyon ko sa laing babaye.

“Di ko gustong duha mi sa imong kinabuhi, Jose,” giingnan ko niya.

Nabugto gyud ang relasyon namo ni Crisanta. Giingnan ko niya nga ang tanan namong escapades together amo na lang ilubong sa kalimot.

Gumikan sa panagbulag namo ni Crisanta, natingob na ang akong panahon ngadto kang Gelia. Malipayon ko sa among relasyon.

Hangtod nga miabot ang Valentine’s Day. May tulumanon nga gipahigayon sa among eskuylahan agi’g pahaom sa Adlaw Sa Gugma.

Kami si Gelia wala motan-aw sa programa. Wala siya motutol dihang gidala ko siya ngadto sa luyo sa library diin adunay daghang tanom nga kamatsilis. Mingaw ug ngitngit sa maong dapit.

“Nganong gidala man ko nimo dinhi?” Nakapangutana si Gelia.

“Maayo dinhi kay way makatugaw nato,” giingnan ko siya. “In other words, duna tay privacy.”

“Unsa man diay atong buhaton dinhi?”

“Depende kun unsay atong masabotan.”

Nahilom mi sa makadiyot. Unya gikawhat ko ang iyang tuong kamot. Gibitad ko siya’g hinay aron pagpaduol nako. Mikusog ang pagkulba sa akong dughan dihang nasingo ko ang kahumot sa iyang gininhawa.

“I love you, Gelia,” hagawhaw ang akong tingog.

“I love you too, Jose,” tubag ni Gelia.

Dihang gihinay nako’g paduol ang akong ngabil sa ngabil ni Gelia, mihana siya’g lingiw. Apan gigunitan ko ang duha niya ka aping aron mapaatubang siya kanako. Ug wala na siya motutol dihang gidaitlan ko ang iyang ngabil sa init nakong mga halok. Mipusnga si Gelia dihang giukoban ko siya’g maayo. -- Sumpayan pa